Pinagkaoroyonan na mantang si Sandoval iyo an orog na may kasipatan (372) bilang tagapagtalumpati, sya an magpadagos kan alap (373).
Hogakon, siring sa giráray, daing anó man na hinandá si Tadeo asin namugtak sa sarong sibot na kamugtakan. Kan sinosórop nya bilang an sarong halábang sotanghon, pinagiísip nya kun paano syang makaipsot sa síring na itong kamugtakan, kan magiromdoman nya su sarong talumpati na naokdan nya sa clase, asin naghandang arogon asin pagliwatliwaton ito.
“Mga minamahal kong mga túgang sa mokná!” nagpoón nin pagtaram na naglalamánong may kapot na duwang sipit na ginagámit kan mga intsik sa pagkaon.
“Háyop! botsani an sipit ta mararaot mo an sakong alapok!” ólay nin saró nyang katáid.
“Inapod kan saindong pagpili sa pagpanó kan lawongan (374) na nabáyaan sa ... ” “Parahúwad!” sinaligbaton sya ni Sandoval; “an talumpatí na iyán su sa presidente kan samúyang Liceo!”
“Inapod kan saindong pagpilí,” nagpadagos si Tadeo na dai nasaringgawán, “sa pagpanó kan lawongan na nabáyaan sa sakong... ísip (asin itinokdó su tulak) nin sarong tawo na maliwánag na gayo huli kan saiyang sa cristiánong katokdoán asin huli kan saiyang mga naiísipan asin mga mokná magkakanigó na magkaigwa nin kadikit na giromdom, anong masasabi saindo nin sarong napupúnaw na gayo huli ta dai namáhaw?”
“!Komoa ka nin sarong líog, chicooo!” an sabi saiya nin sarong katáid na tinaohan sya nin sarong líog nin manok.
“Igwa nin sarong pinggan, mga ginoo, yaman nin sarong banwaan na ngunyan osipon na lámang asin dahelán nin pagbasangbásang kan dagá, saen nagdorólok tangáning isaldok su saindang mga nagkakapurúnaw na mga sandok an orog kadarakúlang mga pasló sa mga solnopanon na mga roná nin kinaban...” itinokdó kan saíyang sipit si Sandoval na nagrarangot nin matagás na pakpak nin guná.
“Asin !mga sirangnon!” an simbag kan pinagpadamgohan na baga kuminúrit nin matalidong kan kutsará tandáng sakod kaito su gabós na mga nagkakaraon.
“!Daing halaga an mga pagsasaligbaton!”
“Hinahágad kong pataramón ako!”
“Naghahágad ako nin patís!” an dúgang ni Isagani.
