an magayagáyang pagsárig na dai pira makikita nindang bulanos an Mahal na Dios. An mga énot na mga Padres de la Iglesia na garong nagpakasambit kainiho, iyo si San Clemente de Alejandría, si Orígenes asin si San Irineo, sakalé, nagkaralasigan (185) kan religíón zarathustriana, na lataw kaidtong panahón asin lakop sa bílog na Sirangan, tara, parati kaming makabasa nin mga pagsosólang sa orientalismo ni Orígenes. An pagkaigwa nin Purgatorio pinatutunayan ni San Irineo huli sa pangyari na si Jesucristo nagdánay nin tolong aldaw sa kairaromi nin dagá, tolong aldaw sa Purgatorio, digdi sinásalom nya na lambang kalag súkat magdánay dumán sagkod sa pagkabúhay liwat kan mga hawak, minsan nganí sa bágay na ini garong sinósudyá sya kan Hodie mecum eris in Paradiso (186). Nagsabi man si San Agustin dapit sa Purgatorio, alagad, kun dai nya pinatutunayan an pagkaigwa kaiyán, dai man nya ibinibílang na sarong bágay na dai sa pangyarí, ipinamugtak nya na duman sa ikaduwang-búhay mangyayáring mapadagos an mga padusa na kinakamtan ta digdi huli kan satong mga kasalan.”
“!Sawá man si San Agustin!” an hagayhay ni Don Filipo; “dai pa namumungayahan kan satong mga tinitíos digdi muya pa giráray na magkaigwa nin kadagosan an mga iyán!"
“Tara siring an lakaw kan bágay na ini: su iba minátubod asin su iba man dai. Alágad minsán ngani inakó na ni San Gregorio sa saíyang de quibusdam lévibus culpis esse ante judicium purgatorius ignis credendum est (187), dai nin mahusay dapit sa síring na pagtubod sagkod kan taón 1439, kun sa pagkasayod pakalihis nin walong (8) sangbahad, kan ipaháyag kan Concilio de Florencia na sikat magkaigwa nin kalayong maglinig kan mga kalag kan mga nagagadan sa pagkamoot sa Dios, alágad dai pa sinda nakakapagbayad sa pagkamatanos nin Dios. Kahurihurihi su Concilio Tridentino, kan panahon ni Pio IV, kan taón 1563, sa sesión XXV nagtao kan decreto dapit sa Purgatorio na síring an kapinonan: Cum catholica ecclesia Spiritu Sancto edocta, (188) etc. saén nagsasabi na an mga tábang kan mga nabubuhay pa, an mga pamibí, an mga limós asin iba pang mga mabansay na gawé, iyo an orog na mga paagi na mapapakinabangan na gayo sa pagligtas sa mga kalag, minsan nganí pinangingibábaw sa gabós
