sa dalan. Asin tangáning maaling sya pominoón nin pagáwit sa hababang tingog. Marayráhay an saíyang tingog, asin kun nadadangog syang nagaáwit nin kundiman, minahiribí an saíyang mga akí na daing mga pagaram kun ngatá. Alágad kan bangging ito naggogorógodó su saíyang tingog asin mapáwot su pagluwas kan nota.
Iinontok su saíyang áwit asin ipinotítok su saiyang paghiling dumán sa kadiklomán. Dai lámang nin nagdadangadang na halé sa banwaan, kun bakong su doros na minapahólog kan túbig sa mga haralakbang na dahon kan mga batag.
Daing ano-ano nakakita nin áyam na itom na tominongab sa saíyang atúbang; su háyop may goyodgoyod sa dalan. Natákot si Sisa, pominórot nin gapó asin dinaklag su áyam. Dominalagan su áyam na nagaaróal nin makapupungaw.
Si Sisa bakong matinubdon sa mga palíhon, alágad kanigúan an mga nadadangog nya dapit sa mga paligsok asin sa mga áyam na itom, kun kayá dinakop sya nin tákot. Panáleng pinintoán su tatá asin tominúkaw sa may ílaw. An kabanggihon angay sa mga pinagtutubod asin an hinonáhoná pinapanó an ákas nin mga makangingirhat na paghilngon.
Boot syang mamibí, na makitumábang sa Virgen, sa Mahal na Dios tangáning pangatamanon su saíyang mga ginahá, orog na nganí su sadang nyang si Crispin. Asin huli sa karibarawán, dai sya nakanoltol nin pag- pangadyé, asin sinda na lámang an saíyang ísip, nagiromdoman nya su panglawog kan lambang saró, itong panglawog na mináhoyom saiya máging torog, máging mata man sinda. Alágad, daing anoano, namaté nyang tominorongkag su saíyang búhok, nabutlá su saíyang mga mata: sa pagloba nya totoo, nakita nya si Crispin na nagtitindog sa may dapog, sa parating tinotukawan kaito sa pakipagolay-ólay saiya. Ngunyan dai nagkokorokaalo; pinagmasdan sya kan darakúla asin morongnanon na itong mga mata asin naghohoyomhoyom.
"!Nánay, buksi! buksi, nánay!" an sabi kan tingog ni Basilio maghalé sa luwas.
Tinakigan si Sisa asin nawará su saíyang nakita.
