ako námuyang magngisi. Nagtitindog ako; namatean kong nagsasakat su dugó sa sakong payo, asin pinadiklom nin dagoldol su sakong hótok. Natanaw ko su cura sa harayó, harayong marhay; napasíring ako saiya ta sisimbagon ko sya. Su sacristán mayor tominindog, su padí asin sinabihan na gayo ako sa tagalog; 'Dai mo ako paggamitan nin gúbing na sinublián; igó na saimo an pagtaram kan saimong horon asin dai mo sayangon an kastilá na bakong manónongod saindo. Midmid mo su maestrong si Ciruela? Si Ciruela sarong maestro na dai tataong magbasa asin nagbugtak nin paadalan.' "Boot ko siyang pogolon, alágad lominaog sa saiyang lalamban asin panáleng pinintó su tatá. Anong maginibo ko na pahangang magsarampot an sakong sahod, na sa pagkobra kaiyan kaipuhan ko an visto bueno, kan cura asin magduman sa capital kan lalawigan, anong maginibo ko laban saiya, énot na may kapangyarihan dapit sa kalag, sa politica asin civil sa banwaan, pinangatigan kan saiyang Kaayonan, kinatatakutan kan Pamahalaan, mayaman, makapangyarihan, pinakikihumapotan, dinádangog asin pinangangataman sa giráray nin kagabsan? Kun ako pagduhagihan, dai ako dápat magkaalo, kun sumimbag ako, tatangkasón ako sa sakong katongdan, na mawawará ko sagkod lámang an sakong carrera, asin bakong huli kaiyan magkikinabang an katongdán, atá ngani an kagabsan maarabuyon sa cura, pagduduhagihan ako asin aarapodón akong vanidoso, halangkaw an hinilngan, maabhawon, matagás an payo, maráot na cristiano, daing-ugalé, asin kun bakó man, anti-español asin suwal, sa pamahalaan. Dai pinaglaláom na an sarong maestro sa paadalan igwa nin pakanood asin kahimonan (232), dai siyang ibang hinahágad kundi kapahubayaan, kahababaan, kasipabayaan, asin patawada ako kun pinaindahan ko an sakong conciencia asin isip, alágad namondag ako sa bansang iniho, kaipuhan akong mabuhay igwa akong iná asin minapahubayá ako sa sakong kapaladan siring sa sarong bangkay na dinadara kan alon."
"Asin huli kan kaolangan na ini luminúyang padagos su saimong boot? Dangan nabúhay ka nin siring?"
"Kun nagimasol lámang ako!" an saiyang simbag, "diyan lámang sana kutá nakasagkod su sakong mga kasakitan! Totoo ngani na magpoón kaito naoyam ako sa sakong carrera, nagisip akong maghánap nin ibang
