bag sa saímong mga hapot?"
Bominuhat man su maestro, alágad nagkikirikiri, tandá nin kaborongan, sominimbag: “Makikita mo na an moknang ini na isinabi sakó makakaárog man kan sakuyá! Kun dai, hilingón ta!"
Saró (1) itong bídang na magpoón sa kagduwa (12) sa kaglimang (15) metro an labá asin magpoón sa walo (8) sagkod sa sampólong (10) metro an lakbang. Su mga lanob kaito na pinaputí nin apog nagkakaparatós nin mga dibujo sa carbon, mga makakanos okun bakó man na gayo, mga dustá okun bakó man na bulanos, na may mga kasuratan na minabilog kan mga kahologán kaito. Sa sarong gílid asin mahúsay na nagkakapasarandig sa lanob, nakikita an may mga sampólong (10) mga daraan nang badil na mga kasarálak nin mga kalawangon na sable, mga espadines asin mga minasbad: mga hamo ito kan mga cuadrillero (250).
Sa sarong (1) sógod kan harong, na nasasamnohán nin mga maating cortinang pula, natatagó asin nasasabit sa lanob an retrato kan Saíyang Kamahalan; sa tangod kan retrato, sa sarong (1) tarímang kahoy, namumugtak an sarong (1) daan na sillón, garaak na su mga ralaglag na takyag kaito; sa atubangan may sarong (1) dakúlang látok na tabla, na may tintang digtá, na may mga inscripción asin mga monograma, síring sa kadakol na mga látok sa mga taberna sa Alemania na pinagdudumanan kan mga nagaarádal. Mga horomó nang bangkó asin mga silla an minabílog kan mga kasangkapan dumán.
Iyo ini an bidang na pinagsesesesyonan kan hokoman, bídang na pinagpapasakitan, etc. Digdi nag-oorólay ngunyan an mga may kapangyarihan sa banwaan asin sa mga nayon: an pangkat kan mga gurang dai minásalak sa tompok kan mga bagong-tawo, asin an mga ini asin an mga ito dai mahímong magtiniríostiósan: nasa partido conservador asin liberal, alágad sa saindang mga pakikibaka nagpapahayag sa mga banwaan nin
