“Hinanyoga ako nindo, mga ginoó, asin ta maniniwalá kamo!” an padagos ni Don Filipo na dai nagluya an saiyang boot. "Iminomókná ko an pagpatindog nin sarong dakúlang teatro sa táhaw kan plaza, sa halagang sanggatós may limang pólong pisos!”
“Kulang an sanggatós may limang poló, sanggatos may anom na poló an súkat ibugtak!" an sabi nin sarong mapagnotiil na conservador.
“Isúrat mo, ginoóng Director, duwang gatós na pisos sa teatro!" an sabi ni Don Filipo. "Iminomókná kong horonon su comedia sa Tondo na magpaluwas sa laog nin pitong (7) bangging soronod. Pitong (7) paluwas na tig-duruwang gatos (P200.00) na pisos lambang sarong (1) banggi, minabilog nin sangribo may apat na gatós (1,400): !isúrat sangribo may apat na gatós (1,400), ginóong Director!”
Nangagtakang nagpahinirilingan su mga gurang asin su mga akí: su mga nagpapakaáram kan tágong-hilom iyo sanang dai naghiriró.
“Laen pa kaini, iminomókná ko man na magkaigwa nin mga darakúlang mga fuegos artificiales; dai súkat magkaigwa nin mga sorosarádit na mga ilaw, síring man nin mga ruédang sorosaráday na nagkakamuruyahán kan mga akí asin kan mga daraga, dai dápat magkaigwa kan mga iní. An muya nyamó mga darakúlang bomba asin mga darakulaon na mga cohetes. Iminomókna ko, kun síring, na magpagibo nin duwang gatós (200) na darakúlang bomba na maduwang (P2.00) pisos lambang saró (1), asin duwang gatós (200) man na darakúlang cohetes sa síring mansanang halaga. Itogon nyató an mga ini sa mga paragibong cohetes sa Malabón.”
“Hmjn!” an saligbaton nin sarong (1) magúrang; “dai ako kinokúrab, dai man ako napopolngan nin bombang halaga nin duwang (P2.00) pisos; su manolong (P3.00) pisos an kaipuhan.
“Isúrat mo sangríbong (P1,000) sa duwang gatós (200) na bomba asin duwang gatos (200) na darakúlang cohetes!”
Su mga conservadores dai na nagpakatagal; nagpanirindog su iba asin nagorólay.
“Saro pa, tangáning makita kan satong mga kapuwa na kita mga tawong masamwang asin ta an kuwarta nagsasawá satuyá," an padagos ni Don Filipo na hina-
