langkaw su tingog asin panáleng pinasikrapán su pangkat kan mga gurang, “sakúyang iminomókná; énot, na magkaigwa nin apat (4) na
hermanos mayores sa duwang (2) aldaw na pintakasi, asin ikaduwa, na sa lambang aldaw magtápok sa dánaw nin duwang gatós (200) na adobádong
manok, sanggatós na rellénong capón, asin limang pólong (50) lechón, síring sa ginigibo ni Sila kaito kan panahón ni Cicerón, na sinasambit
pa lámang ni Capitán Basilio.”
“Iyán, síring ki Sila!" an ulit ni Capitán Basilio na nailay.
Nagorog na magorog su pagtaka. “Nin huli ta dakol an mga madarálaw na mga pirakán asin lambang saró magdadara nin rinibo asin dadarahon man ninda an saindang pinakamarhay na mga manok, asin su liampó asin su mga baraja, minamókná ako nin kaglimang (15) aldaw na borólang, asin kapangyarihan sa pagbukás kan gabós na pasugalan...”
Alágad sinaligbaton sya kan mga bagong-tawo na tuminirindog, sa saindang pagloba naliwat su ísip (260) kan teniente mayor. Maínit su pakipagsúhay kan mga gurang.
“Asin kahurihurihi, tangáning dai maaliwalasan an mga kaogmahan kan kalag...”
Su saíyang tingog natahoban na bulanos kan mga nginorobngorob asin kinurahaw na haralé sa gabós na sógod kan bidang: an bágay na ito bakó nang saró lámang na karibukan.
“Dai!” an kuráhaw nin sarong pusíkit na conservador, “habó ko na omawon sya na iyong nagpapintakasi, dai! Pabayae ako nindo na magtaram!” “Lininlang kita ni Don Filipo!” ólay kan mga liberal. “Vomoto kita nin laban! Omiñápil sya sa mga gurang! Vomoto kita nin laban!”
Su gobernadorcillo na nasopgan nin marhay, daing ginibong anó man tangáning magkaigwa ulí nin kahusayan: hinalat nyang sinda mansana an magpabalik kaito.
Hinágad kan capitán sa mga cuadrillero na pataramón sya; tinogotan iniho, alágad dai binuka su saiyang ngosó asin ta tuminúkaw ulí ribaraw asin sopog. Sa marhay na kapaladan tominindog si Capitán Valentin, orog kamayókod sa gabós na mga conservador, asin nagsabi:
