sa dai pagkaalo asin sa pagpahiling nin kagalangan okun talagang digdi nagpapaháyag nin kalaenan an mga kababayehan?
Daing ibang nagpapataratara sa mga señora kundi an sarong gurang na babaye, pinsan ni Capitán Tiago, na maugayon an panglawog asin baralagbag na magtaram nin kastilá. Dai siyang ibang gibo kundi an pagtangró nin mga tabakó asin buyo sa natotolod sa sarong bandeja, asin an paggawgaw kan saiyang kamot tanganing hadokán kan mga filipina, siring na gayo kan ginibo kan mga fraile. Sa katapusan, namorington su makauúgay na magúrang, asin kan makamate nin pinaragkay nin napasang pinggan, hidaleng luminuwas na nagngongorobngorob;
“!Jesús! Halat kamo, mga tawóng daing kapakanan!”
Asin dai na nagbalik na lumaog liwat.
Kun dapit sa mga lalaki, maribok na marhay su saindang tompok. Su iba sainda mga cadete, na mga maogmang nag-oorólay, alagad sa malúhay sanang tingog, sa sarong gilid, pinagtataga-pasikrapan kan saindang mata, asin kun minsán itinotokdó kan saindang moró an nagkapira katawo dumán sa bidang, asin minangirisi sa hilom; alagad, duwa katáwong daplé, na mga mapuputi su panggubingan, banday su duwang kamot sa likod, magkasi daing girong, sa haralakwas na lakad nagbabalikbálik sa magibongibong na sógod kan kasalahan, siring sa mga nagsasakay na mga nagkakapororinggot sa ibábaw kan sakayan. An bilog na interés asin kadagkahan minagikan sa sarong pangkat na binibilog nin sarong particular asin nin sarong militar, na naghahampangan sa sarong sadit na làtok na may mga árak asin mga biscocho na haralé sa Inglaterra.
Su militar sarong magúrang na teniente, halangkaw, makatatakot an panglawog; baga na sarong Duque de Alba, huli sa bilang kan mga Guardia Civil. Kadikit na magtaram, alágad magabat asin gotos an mga tataramon. Saró sa mga fraile iyo an sarong dominicong hagbayon, magayón asin makinang siring kan saiyang salming sa mata na may manggong bulawan, iyo an Cura sa Binondo asin Profesor sa San Juan de Letrán. Nababantog na siya sarong matimgas na filósofo, malá ngani ta kan panahón na idto an mga dominico boot pang makigsokolán sa bakong mga padi dai nanggad siya naoguot
