mabáyad? Nakatao lámang nin sarong (1) sikápat?" an ólay nin sarong tingog na malágong.
Nagpangsaralingoy su kagabsan sa pinaghahalean kan mga hapot na iniho: itoon su pantás na si Tasio.
Su teniente mayor daing gironggírong na nagpopotítok sa gobernadorcillo.
"Asin anó an sa boot kan Cura?" an hapot ni Capitán Basilio.
"An muya kan Cura... anom (6) na procesión, tolong (3) sermón, tolong (3) misa solemne (265) ... asin kun may mátadang kuwarta, comedia na taga Tondo, na bal-otan nin áwit."
"Habó kami kaiyán!" an sabi kan mga bagong tawo asin nagkápirang gurang.
"Iyan an muya kan Padre Cura!" an olit na tataramon kan gobernadorcillo.
"Nangakó ako sa Cura namaootob an saíyang boot."
"Kun síring, anó ta tiniripon mo kami?"
"Ta boot kong ipatalastas saindo!"
"Tadaw ta dai ka nagsabi pagkapoón sana?"
"Talagang masabi ako, mga ginóo, alágad nagtaram si Capitán Basilio asin dai ako nagkaigwa nin panahón...! Kaipuhan magkúyog sa Cura!"
"Súkat na kuyogon sya!" inolit nin nagkapirang gurang.
"Dápat syang kuyogon ta kun dai, ipabilanggó kita kan Alcalde." (266) mamondong idinúgang nin iba pang mga gurang.
"Magkúyog kamo asin giboha nindo an pintakasi!" ólay kan mga hagbayon na kanayon nagpangburuhat.
"Binabawi nyamó su samong abóloy."
"Nakobra na an gabós!" an sabi kan gobernadorcillo.
Dinólok (267) ni Don Filipo asin mamondong nagsabi saiya:
"Sinacripicar ko an sakong pagkamoot sa sadiri huli sa sarong marhay na dahelán; sinacripicar mo an saímong karapatan dahel sa maráot na dahelán asin gabós saímong rinompag..."
Nagsabi si Ibarra sa maestro sa paadalan:
"May itogón ka sa capital kan lalawigan? Mahalé ako tolos mansana.'
"May tuyo ka?"
