Hiniling kan babaye su kahoy.
"Ika an iná kan mga parahabon, ika?" an hapot kan saró.
"!Iná kan mga parahabon!" an dai pagatipárong ulit ni Sisa.
"Haen su kuwarta na dinara saimo kan mga akí mo kasu-banggi?"
"!Ah! su kuwarta..."
"Dai ka samó magdili ta magiging maráot saimo!" an sabi pa kan saró. "Napadigdi kami sa pagdakop sa saímong mga akí asin dinolagán kami kan matua, saén mo tinagó su ngohod?"
Pagkadangog kaini hominangos si Sisa.
"!Ginoo!" an saíyang simbag, "haláwig na pong mga aldaw na dai ko nakikita an akí kong si Crispin: sa sakong pagloba makikita ko sya sa convento ngunyan na aga, asin dumán sinabihan lámang ako na..."
Su mga soldados nagpahinilingan nin may kahologan na paghiling.
"Nya!" an ólay kan saró sainda; "taohán samó su kuwarta asin ta papabayaan mi ika."
"!Ginoo!" an pakimayó kan daing pálad na babaye; "an sakong mga akí dai nangaghahabon, minsan purunaw: tood kaming magtíos kaiyán (270). Dai ako dinarahán ni Basilio minsán sarong (1) bilog (271). botingkaya nindo an bílog na harong asin kun makakoa kamo nin minsán sarong (1) sikápat, giboha nindo samuyá kun anong saindong muya. Kaming mga daing-súkat bakó kaming anas na mga parahabon!"
"Kun síring," luhaylúhay na sominimbag su soldados asin hiniling sa mata si Sisa,, "omiba ka samuyá; itutunga kan saímong mga akí su kuwarta na saindang hinabon. !Sumonod ka samuyá!"
"Ako? . . . maiba saindo?" an ólay kan babaye sa malúhay na tingog na kanayon síbog asin hiniling na may kaibang katakutan su uniforme kan mga soldados.
"Asin anó ta dai?"
"Ah! magdara kamo nin úgay sakuyá!" nakimayó sya na kúlang na sanang maglohod. "Labilabi ko kadukhá, mayó ako nin bulawan, minsán alahas na ikatao saindo; kinoa na nindo su daing ibaiba kong rogáring, su guná na pigísip kong ipabákal . . . daraha nindo an gabós na saindong masompongan sa sakúyang kamálig, alágad pabayae ako nindo digdi, pabayae nindo
