magtiwásay asin pakaatubanga su mga soldados sinabihan an mga ini sa hababang tingog:
"!Nasa banwaan na kita!"
Dai ikasaysay su saiyang tingog; sarong (1) paghinanakit, panonolsol, agrangay: sarong (1) pagngayóngayó, su kasakitan na ihinólog sa daging.
Nayogtó su mga soldados, sinimbag sya sa pamamatáhaw nin sarong (1) pasabot. Omenenotan si Sisa asin hininguha nyang máhiling na matiwásay su saiyang kamugtakan.
Kan horas mansanang ito nagpoón nin pagrepike su mga campana na nagbabantulin na nakamisa na kan mayor. Sominigkat si Sisa tangáning, kun mahihimo, dai nya ipagsabat su mga tawo na nagruruluwas (278). Alágad sáyang! Dai nin anó man na palakaw na mahímong dai sinda magkasárabat.
Pinataratara nya nin mapait na hoyom su duwang (2) kamidbid (279) nya na naghahapot saiya sa pamamatáhaw nin paghiling, asin pakalihis, tangáning malikayán an mga pagpapasákit na ito, idinokó su payo asin iyo sanang pighiling su dagá. !asin bágay na katakataka! nagkakasiringkogán nya su mga gapó sa lansangan.
Su mga tawo nagorontok nin kadikit na horas kan pagkakita saiya, nagoorolayólay asin sinosonod sya kan saindang mga mata: an gabós na ini, saíyang namamaté minsán nganí dánay na sa ibabá su saiyang mga mata.
Nakádangog sya nin makasosópog na tingog nin sarong (1) babaye na sa likodan nya naghahapot haros nagkukuráhaw:
"Saén nindo sya nádakop? Asin su kuwarta?"
Sarong babaye na mayó nin tapis, nagsasaya nin madilaw (280) asin hidyaw (281) bádong bughaw; sa saíyang panggubingan namimidbid na sambay kan mga soldados.
Sa paghoná ni Sisa garo sya nagmaté nin tampal: hinubáan sya kan babáyeng ito sa atúbang nin dakol na mga tawo. Itiningkálag nin kadikit na horas su saíyang mga mata tangáning mamongayahan sa kaologo- logan asin sa pagbasangbásang; nátanaw nya su mga tawo sa harayó, harayong marhay saiya, minsan siring namatean nya su lípot kan saindang paghiling asin nádangog nya su hinuringhuding. Idtong makauúgay na itong babaye naglakaw na baga dai nagdoot sa dagá.
