ráot na boot. Alágad mahuhuri akong dumuman, pakatapus kong maotob an sakong mga katongdan. Mamongaya ka, huli ta ika hiwas, lubos na gáyong hiwas!"
Mataodtaod, nagpaáram si Ibarra ta aaserkasohon nya su fiesta sa másunod na aldaw.— Madiklom na su kabanggihon.
May dominólok asin nagtaong-gálang saiya sa lansangan.
"Siisay ka?" an hapot ni Ibarra.
"Dai mo, señor, áram an sakong pagngaran," an simbag kan dai midbid. “Duwang aldaw akong naghalat saimo."
"Ta anó?"
"Huli ta saén man daing nagdadarang úgay sakuyá, ta sabi saró akong maráot na tawo, señor. Alágad nawará ko su sakong mga aki asin liwat an payo kan sakong agom, asin an gabós nagsasabi na magkakanigó sakó an sakong pálad!"
Minasdan na panalé ni Ibarra su tawo asin naghapot.
"Anó an boot mo ngunyán?"
"Makitumábang saimo huli sa sakong agom asin sa sakong mga akí!"
"Dai ako makakaabala," an simbag ni Ibarra. "Kun muya mo omiba ka, sa dalan ikakasabi ko kun anong nangyari."
Nagpasalamat su tawo asin mataodtaod nawará sinda sa kadiklomán kan mga lansangan na bakong marhay su pagkaílaw.
Nagkokorokirildab pa su mga bitoon sa kalangitan asin su mga yamón nagkakáratórog pa sa mga sanga, kan maglakaw na sa mga lansangan kan banwaan an sarong maogmang pangkat pasíring sa dánaw, sa liwánag nin karábang sálong, na pinagaapod dadyangaw.
Limang (5) daragítay na hidalé su lakaw, nagkakarabitan sa kamot okun sa ikasan, pinangagsosonod nin mga gurang na babaye asin nin nagkapirang sorogoón na mga babaye na may mga soknong na mga alat na may mga kakanon na laog, mga pinggan asin iba
