pa. Pagkakita nyamó kan saindang mga lawóg saén nagngingisi an pagkabagong-tawo asin namamantáag an mga pagsárig, sa paghilinghíling mi na ipinagpapalidpálid kan doros an mahibog asin maitom na búhok asin an haralakbang na tiplok kan saindang mga damit, aakalaon nyamó na sinda mga diwatá sa banggi na nagdudurulag sa aldaw, kun dai mi isi na si María Clara asin su apat (4) nyang mga amiga: an magayagáyang si Sínang, na saíyang pinsán, an mangirhat na si Victoria, an magayón na si Iday asin an morongnanon na si Néneng, an kagayonan na malólot asin matatakton.
Mga matarakas su saindang orólay, nagngingirisi, nagkokorodotan, naghihiringhingan, dangan minaaararak-atak.
"Magpapakapolaw kamo sa mga tawong nagkakaratórog pa!" dinaragitan sinda ni Tía Isabel; "kan mga akí pa kami daing gayo kami nagpaparariríbok."
"!Síring man dai kamo nagmamaratang átab na síring samuyá, bakó man na mga matotorognon su mga gurang kaito!" an simbag kan sadit na si Sínang.
Dai nagkaaralo sa laog nin kadikit na horas, pinagluhaylúhay ninda su saindang tingog, alágad madaleng magpakalingaw, nagngingirisi asin napapanó su lansangan kan saindang mga sa akí pa asin mga madaging na tingog.
"!Magsaginsagin ka baldí, hare pakiólay saiya!" an sabi ni Sinang ki María Clara; "iwala tangáning dai nya paganadan an maráot!"
"!Hare pakahigpit na gayo!" an sabi ni Iday.
"!Magpakahigpit ka, hare pagminangmang! An katipan súkat na magkúyog kun katipan pa, ta kun agom na, minagibo na kan saíyang muya!" ân hátol kan sadít na si Sínang.
"!Anong masabotan mo kaiyán, akí?" sinagwé sya kan saíyang pinsan na si Victoria.
"!Sst, halo kamo ta may nagdadangádang!"
Igwa man nanggad nin nagdadangádang na pangkat nin mga bagong-tawo na nagiirílaw nin mga darakúlang karábang botong. Daing kinaaralohan su saindang lakaw, sa tanog nin sarong guitarra.
"!Garong guitarra nin makilimos!" an sabi ni Sinang na nagngingisi. Kan magkasabatan su duwang (2) pangkat, su mga babaye iyo nang mga daing girong na baga dai pa nagpakanood nin pagngisi; alágad su mga
