sa salog kan mga daraga pa kita? Monan mo kaiyan may mga pinag-anod na mga balsang barani (298), na may sarisaring mga bungang-kahoy sa tahaw nin mga maalimyong mga burak. Lambang saro (299) may sadit na wagayway (300) saén nasusurat an satong mga pagngaran...”
“Asin kun kita pauli na sa harong?” an saligbaton nin saro man na dai pinatapus su énot; “inaabtan nyato su tulay na botong ralaglag asin sa siring na bagay nagagamiritan kitang dumakit sa sapa... an mga amamagrot!”
“!Oho!” an sabi ni Kapitanang Tika, “alagad pinagmamarhay ko pang madomog su gayad kan sakong saya ki sa mahayag an sakong bitis: batid ko na sa mga gaho sa pangpang may mga matang nagmamarasid.”
Nagkiriyatan asin naghoroyomhoyom su mga daraga na nagpakadangog kan mga bagay na ini; su iba igwa man nin pinagooroloyan asin nangagsipabaya lamang.
Daing iba saro katawo lamang, su nagpipiloto, an daing gironggirong asin sa luwas kan kagayagayahan na ito. Sarong hagbayon na posog su panglawas asin makaaagyat su pamandokon huli kan saiyang mamondong mga mata asin mahigpit na guhit kan saiyang mga ngabil. Su buhok maitom, haralaba asin gorobot, nagkakaranap sa matataba nyang liog; sarong damit na hababang halaga asin malatom, namamantuag sa mga tiniplokan kaito kan saiyang masasarig na mga takyag sa pagpalakaw, siring sa sarong balikag, sa sarong malapnad (301) asin dakulaon na sagwan, na ginagamit niyang timon sa pagpadalagan kan duwang (2) itong sakayan.
Bako sanang makasaro sya namangnohan ni Maria Clara na pinagmamasdan nya ini: sa siring na bagay itinotoparing nya an saiyang paghiling sa harayo sa bolod, sa pangpang. Nagdara nin isay su daraga huli kan saiyang pagsaro-saro asin kominoa nin nagkapirang galletas dangan itinangro saiya. Hiniling sya nin pagtaka kan piloto, alagad an paghiling na ini nagsaro sanang detik (302); kominoa nin sarong galletas asin sa gatos na tataramon nagtao nin kapasalamatan sa tingog na pahangé nang mamaté.
Asin dai nin nakagiromdom uli saiya (303). Su mga maogmang ngisi asin soba kan mga bagong-tawo dai lamang nakaliwat kan saiyang lawog; dai sya napangisi
