Nagpaipli asin naghinirib si Padre Salvi sa poón nin sarong dakúlang kahoy.
"Kun sa pagkasáyod muya mong gibohon saiya an ginigibo saimo kan cura, na ikasanang borobantay minsán saén?" an simbag nin sarong magayagáyang tingog. "Magingat ka ta an mga pagimón nakakapaniwang asin nakakapaharárom nin mga mata!"
"Bakó, bakong pangimon, saró lámang na kaosiyosohan," an simbag kan matiling na tingog, alintanang inoólit kan maogma, "Oh, pangimon, mga pangimon!" asin hominarakhak.
"Kun ako mangimon, sa lugar na magtagolipod ako, gigibohon ko siyang tagolipdan, tanganing dai nin makakita saiya."
"Alágad sagkod ika dai makakakita saiya, bagay na bakong marhay. An orog karahay iyo na kun, sakalé, masompongan ta an sálag, satúyang ipásib (310) sa cura, sa bágay na ini, makakapagbantay sató na dai kaipuhan na satúya siyang makita."
"Bakong iyo?"
"Dai ako naniniwalá sa sálag kan iyagwak," an sabi man nin saró pang tingog; "alágad, kun ako magkaigwa nin pangimon, bahalá na akong magbantay asin magpani-tagolipdan..."
"Asin paano, asin paano? Siring daw, sa sarong Sor Escucha?" (311)
An sa colegiálang ining giromdom nakapúkaw nin mga maogmang arakatak.
"Talastas mo kun paanong nalilinlang siya, si Sor Escucha!"
Maghalé sa saiyang pigpapaiplian nakikita ni Padre Salvi si Maria Clara, si Victoria asin si Sinang nagsosorogsog sa sálog. Su tolo (3) nagraralakaw sa tubig su paghiling, pigaanínaw su makagigilantas na sálag kan iyagwak; duromog sagkod sa tóhod, su mga tiniklopan kan saindang mga palayón minapabantáag kan bantúag kan saíndang mga páa. Rologay su saindang mga buhok asin háyag su saindang mga takyag asin napapatós su kalawasan nin damit na haralakbang su kambaya asin mga marayráhay su kúray. Su tolong (3) daraga, laen pang naghaharánap nin sarong (1) bagay na dai mangyayaring makoa, namomorodó man nin mga búrak asin nanggaratós nin mga gugulayon na nagtuturubó sa pangpang.
