Ribaraw asin dai nakatagal, suminimbag su cura:
"Ako kayá an maninimbagan kan kuwartang ito..."(329)
"Marayráhay na simbag, kagalanggalang na paraatamán nin mga kalag!" an ágaw na tataramon kan alférez na panó su ngosó. "!Marhayráhay na simbag, táwong banal!"
Matampo kutá si Ibarra, kundi nagpirit na sumimbag si Padre Salvi kaiba an sa kapiritan na pagngisi:
"Asin dai mo áram, Señor Alférez, an mga sarabisabi dapit sa pagkawará kan sinambit nang mga aki? Dai? Kun siring, hapota an saimong mga soldados!"
"Anó?" hominagayhay sya na nawará su kaogmahan.
"Sabi kan bangging pagkawará may nádangog na nagkapirang potok!"
"Nagkapirang potok?" inolit kan alférez, na hiniling su mga dudumán.
Tominangó an mga ini (330).
Dangan sa luhaylúhay asin sa sarong mabangis na pagtuyátuyá, sominimbag si Padre Salvi.
"Iyan, sakong nakikita na dai mo nadadakop an mga táwong maliwag, dai ka man nin pagalamáam kan ginigibo sa saimong harong asin boot lumaog na tagapaghúlit sa iba kan saindang katongdan. Dápat mong maaraman itong talinhagá na !Tatao pa an rongaw sa laog kan saiyang harong. (331)
"Mga ginóo!" an saligbaton ni Crisóstomo kan makita nyang nanglulungsi na su alférez; "dapit sa bágay na ini, boot nyákong maisihan kun anong sabi nindo kan sakúyang nasa sa ísip. Muya kong ibugtak an rongaw na iyán sa pangataman nin sarong marhay na médico, asin sa tábang asin mga pasunod nindo, hahanapon ko an saíyang mga akí.
Su pagbalik kan mga sorogoón na dai nasompongan su rongaw na babaye, nakapatiwásay sa duwang (2) magkaíwal, asin naliwat su pinaghororonan.
Pakatapus kan ipinaglilibot su tsa asin su café, nagharamán nin nagkapirang pangkat su mga bagong-tawo asin su mga gurang. Kinoa kan iba su tablero, su iba man su baraha, alágad mantang boot nindang maaraman kun anong mangyayari ngápit, pinagmarhay kan mga daragítay na nagpahayag nin nagkapirang hapot sa Rueda nin Kapaladan.
"Tabi man, Señor Ibarra!" an sabi ni Capitán Ba-
