alisngaw nin payo kundi romdomón nya an sa ngápit sa panahón: sarong sadit na hotel sa Madrid, sarong sadit na harong sa uma sarong marhay na maglaog tangáning mamúhay mayaman sa Corte, iní an súkat nyang hanapon sa Filipinas. Dai kita maghágad nin mga gibong ngangalasan, dai kita maghágad na magmalasakit kan karahayan kan Kaporóan an minadigdi bílang sarong dayuhan sa paghanap nin kayaman asin mahalé mansana. Anó saiya kan mga kapasalamatan okun panarangin nin sarong banwaan na dai nya midbid, saén dai syang súkat pagromdomón, saén dai sya nin minámahal? An kaomawan tangáning kaoyayahan, kaipuhan na dumaging sa pagdangog kan satong mga mamomotan, sa kalikosan kan satong mga pagsadiri o kan bansá na magingat kan satúyang mga ka-bokabo; boot nyató na an ngoyaya magtúkaw sa satong linobngan tangáning painiton kan mga sírang
kaiyán an lipot nin kagadanan, tangáning dai nanggad kita mahólog sa dai-nin-saysay, kundí may matadá lámang satuyá. Dai kaini nin ikakadúsay nyató sa minadigdi tangáning pangatamanon an satong kapaladan. Asin an lálong maráot kaini gabós iyo na minabaralé kun napopoón nang magpakasábot, kan saindang katongdan. Alágad naghaharayó kita sa satong pinagoolayan."
"Dai, bago satong balikan iyán kaipuhan na liwanagon ko an nagkakapirang bagay," an maogmang saligbaton kan hagbayon. "Makakaoyon ako na dai midbid kan Pamahalaan an banwaan, alágad naniniwala ako na lálong kúlang an pakamidbid kan banwaan sa Pamahalaan. May mga may-katongdan na mga daing kanongdanan, alagad igwa man nin mga marhay asin kun an mga ini daing nagiginíbong anó man, iyo ta an mga iyán namumugtak sa kaibahan nin mga tawong nangangaliwalas lamang mga namanwaan na kúlang nin pakalábot sa mga bagay na mapádapit sainda. Alágad dai ako napadigdi sa pakipagolayolay saimo dapit sa bágay na ini: napadigdi ako sa pakihumátol saimo asin sinabihan mo ako na idokó ko an sakong payo sa mga pangit na mga diyosdiyos..."
"Ohó, asin inuulit ko na digdi súkat idokó an payo okun pabayaan na mahólog iyán."
"Kun idoko an payo okun pabayaan na maholog iyán?”
