an ulit ni Ibarra.
"!Dai kang padudumanan sa bagay na iní! Alágad anong dahelán? Dai daw magkabágay an pagkamoot ko sa sakúyang banwaan asin an sakuyang pagmahal sa España? Sakalé, kaipuhan na magpakahababá an saró tangáning mani marhay na cristiano, rangsaán an rogáring na isip tanganing makamtan an sarong marhay na katuyohan? Namomotan ko an sakúyang banwaan, an Filipinas, huli ta útang ko saiya an sakúyang búhay asin an sakúyang kagayagayahan, asin huli ta an siisay man na tawo nagkakaipong magmahal sa saíyang banwaan; minámahal ko an España, an banwaan kan sakúyang mga magúrang, huli ta, sa táhaw nin mga pangyayari, útang saiya kan Filipinas asin magiging útang kaini an saíyang kagayagayahan; católico ako asin iniingatan kong dalísay an pagtubod kan sakúyang mga kaganak asin dai ko masabutan kun ngatá ta kaipuhan na idoko ko an sakúyang payo, kun ikakatongkáhal ko mansana iyán, itao iyán sa sakúyang mga kaiíwal, na sakúyang sindang matitimaktimakán?"
"Huli ta an pangómahon na muya mong tanomán nasa kapangyarihan kan saímong mga kaiwal, asin dai ka nin kosog laban sainda... Kaipuhan na humadok ka ngóna sa kamot na iyán na...
Alágad dai sya pinatapos kan hagbayon asin sominabi sa kaangotan:
"Humadok! Alágad nalilingawán mo na sa saindang pagiriba may guminadán kan sakúyang amá, hinalé ninda sa saíyang linobngan... alágad ako na saíyang akí dai kaito nakakalingaw, asin kun dai ko sya pinanghihimalos, iyo ta hinihiling ko an dangog kan Religion."
Idinoko kan gurang na filósofo su saíyang payo.
"Ginóong Ibarra," an luhaylúhay na saíyang simbag; "kun nagigiromdoman mo pa an mga bagay na iyán, mga bagay na dai ko ikakasadol na saímong lingawán, talikdan mo an saímong iniisip asin hanapa sa ibang póok an karahayan kan saímong mga kahimanwa. An móknang iyán nagkakaipo nin ibang tawo huli ta, sa paggibo kaiyán kinakaipuhan bakó sanang kuwarta asin boot, sa satúyang banwaan man an pagpahubayá, pangotíil asin pagtiwalá huli ta dai naghahandá an dagá: nalalakpan pa nin mga mariwbáriw."
