"Daing isinadol saimo an símong kinabatiran kundi lámang an matagás na ining palakaw?"
Kinaptan sya kan gurang sa takyag asin dinara dumán sa bintaná. Mahayahay su hinoyophúyop kan doros, tandang nagdadangádang su amihan; sa saíyang mga mata nalaladlad su tanaman na an sagkod sarong mahiwas na kadlagán na ginagamit na pagalingalingan baga bílang.
"Tadaw ta dai kita umárog sa malúyang buburaknan na iyán, na palíbot nin mga búrak asin mga búkol?" an sabi kan filósofo na itinukdó an sarong magayon na rosal. "Nayogyog iyán kan paros, kun kayá duminokó na garo baga tinatagó su saíyang mahalagang dara. Kun nagdánay na tanús su rosal, nabarí kutá, iwawagas kan doros su mga búrak asin masasáyang su mga búkol. Nakalihis su doros asin tuminanos namán su buburaknan, na ipinaghahalangkaw su saíyang iniingatan, siisay an masombong saiya na dominokó sa pangangaipo? Hilinga dumán an lawaan na kópang na hinihiro an saíyang mga bulawan na mga dahon asin mga sanga, na sinasalagan kan águila. Dara ko iyán halé sa kadlagán sarong malúyang tinanom; sa laog nin haláwig na mga bulan tinalisogan ko su iun kaiyán nin mga manipís na mga balá. Kun dakulá nang dinara ko asin sangkap nin kabuhayan, daing duwaduwa na digdi dai kutá nabúhay; yinogyog kutá kan doros bago makatulahok sa dagá su mga gamot, bago rumigon iniho asin magkaigwa kan kinakaipuhan na ikabubuhay na magkakanigó sa tindog asin pagkadakulá kaiyán. Síring an mangyayari sa sarong tinanom na dinara digdi halé sa Europa sa magapong ining dagá, kun dai maghanap nin masarigan asin maluwas na tagiltilon. Nasa maráot kang kamugtakan: garong alangalang an dagá, an langit minabantulin nin barongbarong asin an arimpungayan kan káhoy kan saímong angkos napatunayan na nagpapakabútong kan lintí. Bakong sa marígon na boot, kundí sa kalolongan an pakipagbaka na daing kasurog labán sa gabos na nabubuhay; dai nin
