Su maestro sa paadalan asin may mga tolong polong (30) hagbayon naggiribo nin mga corona, nagtarakod nin mga wagayway sa mga saradit na togod na kawayan na nagkakaparatos nin mga pinaborotog na yamit na puti.
“Hinguaha nindo na mapakarhay an pagkasurat kan mga titik’! an sabi sa mga nagguguruhit nin mga tanda; “madigdi su Alcalde, dakol na mga padi an madaralaw, sakalé, su Capitan General na nasa lalawigan ngunyan. Kun mahiling ninda na mga marhay kamong magguhit, oomawon gayod kamo.”
“Asin tataohan kita nin pizarra...?”
“!Siisay makaaram! alagad si Sr. Ibarra nagtogon na nin saro sa Manila. Sa aga may madatong na mga bagaybagay na paghihirirason saindo bilang pasib.... Alagad, pabayae nindo na malogom sa tibig an mga burak na iyan, sa aga gigibohon ta su mga ramillete, magdara pa kamo nin mga buirak, ta kaipuhan na mapatus kan mga iyan an latok; an mga burak nakakapaogma sa paghiling.”
“An sakuyang ama madara sa aga nin mga burak nin bainu asin sarong (1) kararaw na sampaga.”
“Su sakuya nagdara nin tolong (3) karétang baybay asin dai nagpabayad.”
“Su sakuyang amaon nangakong mabayad nin sarong maestro!” an dugang kan makoama ni Capitan Basilio.
Tara, su mokna uminaniningal haros sa kagabsan. Su cura nangako na sya an mapadrino asin mabendicion sa pagbugtak kan patugmaran na gapo, ceremonia na gigibohon sa hiring aldaw kan pintakasi, na iyo an saro sa nangongorog na mga ceremonias. Su cuadjutor kuyompos na dominolok ki Ibarra asin ipinagkaugdan saiya an gabos na mga itoong sa misa kan mga devoto sagkod na mahaman an edificio. Labi pa kaini, si Hermanang Rufa, mayaman asin matimol na babaye, nagsabi na kun magkilang nin kuwarta, malibot sya sa pakilimos sa nagkapirang banwaan, asin ta dai syang hinahagad kundi bayadan lamang an saiyang lakaw asin pagkaon, asin iba pa. Nagpasalamat saiya si Ibarra asin nagsimbag:
“Dai kitang makakamtan na dakilang bagay, tara bako akong mayaman, siring man dai ako nangakong magpatindog kainiho sa gastos nin iba.”
