Namungayahan saiya asin ibinílang syang panalmingan kan mga bagong-tawo na haralé sa Manila ta madarálaw sa pintakasi; alágad siring sa haros nangyayari, kun muya kitang umarog sa mga lataw na tawo, dai kitang naadrog kundi an saindang kasadayan,kun bakong an saindang kakundian, ta dai man kita magkakanigo nin ibang bagay; kadaklan kan mga taga-hangang iniho nagmamangno sa palakaw nin sarong hagbayon sa pagbugtak kan saiyang curbata, an iba sa cuello kan camisa asin bakong didiit an sa bilang kan mga butones kan saiyang americana asin chaleco.
Su mga makahahandal na paggigilagila ni gurang Tasio garong lubos nang nagpurawas. An siring na bagay ipinahdagad ni Ibarra sarong aldaw, alagad suminimbag su mahandalon na gurang:
“Giromdoma su sabi ni Baltazar:
- ‘Kung ang isalubong sa iyong pagdating
- Ay masayang mukha’t may pakitang giliw,
- Lalong pagingata’t kaaway na lihim’” (353)
Si Baltazar bako sanang paratula kundi sarong madunong.
An mga ini asin iba pang mga bagay nangyari kan
visperas bago somolnop su aldaw.
PAGSINAROM
Sa pagsadiri ni Capitan Tiago ginibo man an makiring paghanda. Midmid nyamo an kagrogaring; an saiyang pagkaoldot asin an saiyang sa taga Manilang kapalangkawan sikat na makapahababa kan kabantogan nin mga taga lalawigan. Saro pang nakapirit saiya na maghinguhang malabihan nya su iba: duduman si Maria Clara asin itoon su saiyang magiging mantgang, na iyo na sanang pinagoorolayan kan mga tawo.
Tara, saro sa mga pahayagan sa Manila pinanongdan siya nin sarong articulo sa énot na dahon, na an titulo:! Aroga nindo siya! pinano siya nin mga hatol asin mga kaomawan. Inapod siyang bantog na hagbayon asin mayaman na capitalista; duwang rayray sa oroibaba na midbid na tawong masamwang; sa
