“Ngunyan ika-11 pagkaaga nakita nyamo an sarong hilingon na lubos na gayong makayuyugto. Ngunyan na aldaw, siring sa natatalastas nin kagabsan iyo an kapiyestahan kan Virgen de la Paz, asin ginigibo iyan kan mga Hermanos kan Santisimo Rosario. Noodma, iyo an fiesta kan Patron, si San Diego asin may kabtang diyan nangorog nang gayo an mga Hermanos kan Venerable Orden Tercera. Sa tahaw kan duwang (2) ining kaayonan may sarong banal na pagpalinabawan sa paglingkod sa Dios, asin an kabanalan na ini minasampot sa mga sinanglitan na kasingpilan nin boot sa magibongibong, siring sa nangyayari pa lamang kan pagpasuhayan an sarong dakulang predicador na halangkaw an dangog, an bako pa sana pira kasambit na si Muy Reverendo Padre Fray Damaso na magamit sa aga kan Catedra kan Espiritu Santo (357) huli sa sarong sermon na, siring sa pangkagabsan na pagakala, maluwas na sarong pangyari sa katinubdan asin sa kasuratan.
“Tara, siring sa sinabi na nyamo, samuyang nakita an sarong makayoyogtong hilingon. Anom (6) na mga aki pang religioso, su tolo (3) mamisa (358) asin su tolo (3) man mga acolito asin, pagpakalohod sa pamitisan kan altar, pinonan kan celebrante na si M. R. P. Fray Hernando de la Sibyla, su Exsurge Domine, na iyong ipinopoon kan procesion sa palibot kan simbahan, kan makangangalas asin sa banal na itong tingog na minagibo saiya na magkakanigo kan pangkagabsan na pagtaka. Pagkatapus kan Exsurge Domine, su gobernadorcillo, nakasolot nin frac, dara su guingon pigsusunod nin apat (4) na acolito na may mga incensario, nagpoon su procesion. Sa hurihan kan mga ito su mga ciriales na pirak, su mga principales sa banwaan, su mga mahalagang ladawan na mga nagugubingan nin raso asin bulawan, ni Santo Domingo, San Diego asin kan Virgen de la Paz na may mahalagang gayong bughaw na lambong na may mga nagkikintab na mga pinilpig na dinoradong pirak, regalo kan banal na ex-gober-nadorcillo, kanigo-nigo na gayong arogon asin dai pa sagkod nasambit nin igo an pagngaran, si Don Santiago de los Santos. An gabos na ining mga ladawan anas na mga nasa carrong pirak. Kaming mga kastila asin iba pang mga religioso nasa hurihan kami kan Ina nin
