tanganing maging maogma su pintakasi asin magdanay su kaogmahan na pinagtotodan kan mga kastila, sa mga siring na bahigay na dai ninda mapogolan an saindang sadiri, ipinahahayag ninda, iyan nang sa awit o sa sayaw, iyan nang sa mga masipag asin mga magayagayang mga kaalingan, na sinda may mga malinig asin mga marigon na puso, na dai nakakapaluya kan saindang boot an mga kadalitaan asin igo na na sa sarong pook may magkatiripon na tolong (3) kastila tanganing mapara duman an kamondoan asin kababloyan. Mga mananagom asin nangagsasawang padagos su mga ipigkaya sa kadaklan na mga harong, alagad orog nang gayo sa pagsadiri kan lataw na milyonaryong filipino, saén kami inanyayahan nin pagkaon. Dai na kaipuhan na sabihon ko pa saimo na su handa, na managomon asin marayrahay na gayo su pagkatolod, ikaduwa kan sa kinasal sa Cana o sa Camacho, na pinakarhay asin dinugangan. Kan nagkikinabang kami kan mga kagayagayahan kan mga korokakanon na pinamahalaan nin sarong cocinero sa la Campana, nagtotogtog nin mga makawiwiling togtog su musica. An nagugibing kan magayonon na aking daraga kan kagharong sarong traje de mestiza asin patos nin mga brillante, asin, siring sa nangyayari sa giraray, iyong reina kan pintakasi. Ipinagmondo nyamo gabos sa irarom kan samong mga puso na huli sa pagkatinga kan saiyang magayon na bitis dai sya nakapagkamit kan kagayagayahan sa pagsayaw, tara kun hihilingon nyamo sa mga ipinapahiling nyang tibay sa ano man, masasabi na si Bb. de los Santos marayon na gayong magsayaw.
“Su Alcalde kan lalawigan ominabot ngunyan na hapon tanganing huli kan saiyang dagyang maging maogma an ceremonia sa aga. Ipinagmondo nya su kamatean kan lataw na may-sadiri, si Gindong Ibarra na, sa hérak nin Dios, siring sa sinabi samuyaé, marayrahay na.
“Marayrahay su procesion ngunyan na banggi, alagad mapadapit, kaini isasabi ko saimo sa sakong surat noodma, ta, laen pa kan porokpotok kan mga bomba na iyong dahelan na mapolngan ako asin pamongongon, napapagal akong marhay asin dinadaog na ako kan pirot. Alintanang nagpapaomay ako sa mga takyag ni Morfeo, kun sa pagkasayod, sa catre sa convento, magkamit ka logod nin mabansay na kabanggihon, napapalaén
