kuwitis asin mga buscapiés, na iyo man an mga
nakapapagngirisi sa mga aki. Sarong banda an nagtogtog
sa tangod kan convento, saro naghatod sa mga taga
municipio, nagkapira su nangaglibot sa mga lansangan
saen nangagraralayawlayaw an kadakol na mga wagayway.
Su paghiling nalinga kan liwanag asin manibaibang
kuray; su pagdangog, nin mga togtog asinmga potok.
Daing ontok nin karerepike su mga batingaw, sorosarabay
su mga coche asin su mga calesa, nasu mga kabayo kun
gayod nagkakatarakot, nagkikinaranding, nagturuwadtawad,
an mga ini minsan dai kabilang sa mga makadadagkang totoo.
Su Hermano Mayor kan aldaw na ini nagpadara nin mga sorogoon tanganing manghanap sa lansangan nin mga maanyayahan siring sa itinao sa sarong dulaan na ipinagoosip satuya kan Evangelio. Kasi sa kapiritan, su paganyaya na mahigop nin chocolate, café, tsa magkakan nin dulce asin iba pa. Bakong didiit pangyari na garo nang kapagbootan su paanyaya.
Mapoon na su misa mayor, su misa na indapod de dalmatica, siring kan kasoodma na sinambit kan karapatdapat na corresponsal, an kalaenan sana ta an celebrante iyo si Padre Salvi asin sa mga masirimba kabilang su Alcalde kan lalawigan, dakol na mga kastila asin mga tawong mga may inadalan paghinanyog ki Padre Damaso na may daktilang dangog sa lalawigan. Su alférez mansana na sa giraray iyong linalagpakan kan sinasabi ni Padre Salvi sa mga sermon, mahinanyog man kan misa sa pagpatotoo kan saiyang mabansay na boot asin sa pagparaé, kun mahihimo, kan mga maraot na horas na pinapagagihan saiya kan cura. Dakilang gayo an kabantogan ni Padre Damaso, mala ngani ta su corresponsal sominorat na dapit kainiho sa director kan pahayagan kaining minasunod:
“Su sakong ibinareta saimo sa sakong bakong hurisay na surat kasoodma, iyong talagang nangyari. Nagkaigwa kami nin napapalaén na kapaladan sa makadangog ki Padre Damaso Verdolagas, cura kaidto sa banwaan na ini, ibinalyo sa lalong dakilang banwaan bilang balos sa saiyang mga marhay na paglingkod. Ginamit kan bantog na predicador su pulpito, sa paghilwas nin sarong orog kagayon asin hararom na sermon, na nakasadol na magbaklé asin nakapagilantas sa gabos na mga binonyagan na naghaharalat na padagos na lumuwas
