Sarong magurang na babaye, kabilang sa mga nakagubing nin guingon, si Hermanang Puté, nagsabi sa saiyang makoapo, sarong aking babaye na may anom na taon, na naglolohod sa saiyang kataid:
“Condenada! mangataman ka ta makakadangog ka nin sermon na siring kan sa Viernes Santo!”
Asin kanayon kinodot, na napukawan su kabanalan kan aki na hominorathorat, pinalaba su ngodoy asin kominorondot.
Su ibang mga lalaki, na mga nagtotorokro, nagtotorongka sa may mga pakumpisalan. Sarong magurang na lalaki, nagdodongadunga, nakapatubod sa gurang na babaye na nagsasapa nin mga pangadyeon asin maliksing pipaagi su mga moro sa saiyang rosaryohan. Asin iyo ito an orog Kamagalang na pagsunod sa mga itinatalaga nin langit, asin sa luhayluhay inarog ito.
Nasa sarong sogod si Ibarra; si Maria Clara, naglolohod sa may altar mayor, sa sarong pook na, sa mabansay na boot, pinahalean nin mga tawo sa mga sacristan. Si Capitan Tiago na nakasolot nin frac, nagtutukaw sa mga bangko na tagama sa mga may kapangyarihan, huli kaini, su mga aki na dai taratao saiya, naghoronang saro syang gobernadorcillo, asin dai nangarahas na domolok saiya.
Katapustapusi ominabot man giraray su Alcalde kairiba su saiyang Estado Mayor, halé sa kristiya asin tuminukaw sa saro kan mga magagayon na mga sillon sa ibabaw nin sarong alfombra. De gala nanggad su solot kan Alcalde, namamantaag su banda ni Carlos III asin apat o lima pang mga condecoraciones.
Dai sya namidbid kan banwaan.
“!Abaa!” an sabi nin sarong paraaldaw; “!sarong civil na sa comediante an gubing!”
“!Mangmang!” an simbag na may kaibang siko kan saiyang kataid; “si princepe Villardo na nahiling ta kasubanggi sa teatro!”
Hominalangkaw su pagkatawo kan Alcalde sa mga mata kan banwaan, naging sarong princepeng encantado, nakadaog nin mga gigante.
Nagpoon su misa. Nagpangburuhat su mga nagtutukaw, nagkagirimata su mga tororog kan tanog kan tilingtiling asin kan madadaging na mga tingog kan mga cantores. Si Padre Salvi, sa tahaw kan saiyang
