hakbot nin raga tataramon, sa paghilwas nin sorosonod
na mga pagsadol asin mga padamgo pati mga panarangin.
“Nagkakagaradan kamong daing pagsolsol, lahi nin mga hereje! Digdi mansana sa ibabaw nin daga nin mga pagkabilanggo asin mga bilanggoan! An mga kasar-an (382), an mga babaye sikat na dumurulag saindo, sukat kamong birilingan kan mga nagkakapot kan pamahalaan tanganing dai kumalat an banhi ni Satanas sa tanaman kan Kagurangnan!... Si Jesucristo nagsabi: ‘Kun igwa kamo nin mardaot na kabtang sa hawak na nakakasadol saindo sa pagkasala, potola nindo, sogbahan nindo sa kalayo... !’”
Anggot si Padre Damaso, nalingawan su saiyang sermon asin su retorica kaito.
“Nadangog mo?” an hapot nin sarong hagbayon na nag aadal sa Manila sa saiyang kairiba: “popotolon mo?’
“Sus! sya ngona an oménot!” an simbag kan saro na ipigtotokdo su predicador.
Dai na matukaw si Ibarra; nangalagkalag sa saiyang palibot sa paghanap nin sarong gilid, kundi pando su bilog na simbahan. Daing anong nakita, dai man nin anong nadangog si Maria Clara, na nag-aatidatid kan cuadro kan mga benditong kalag sa Purgatorio, mga kalag sa lawog nin mga lalaki asin mga babaye na huruba, na may mga mitra, mga capelo okun mga toca, na nagkakatorotong sa kalayo asin nangangarapot sa cordon ni San Francisco, na dai napapatod minsan makiring gabat.
Su fraileng Espiritu Santo, huli kaitong mga isinaliabot na ito nawaran kan pagkasoroysoy kan sermon, asin tolong (3) babakan na haralaba an nagkaroloktosan, rilibang su pagkapasunod ki Padre Damaso na naghihingak kan saiyang mga isinabi.
“Siisay saindo, mga parakasalang nagdadarangog sakuya, an mamomoot na domila sa ligad nin sarong dukha asin nangunitkunit na makilimos? Somimbag asin iitaas an kamot! Daing siisay pa man! Dati ko nang Aram: saro lamang na santo na siring ki Diego de Alcala an makakagibo kaiydn; dinilaan niya su bilog na kalugadan, nagsabi sa sarong nanggigilantas na hermano: ‘Siring an pagbolong sa naghehélang na ini! !Oh pagkamoot na sa cristiano! Oh pagkaugay na
