Asin nagpadagos huli sa sarong halabang lista nin mga hagayhay, na idinodupa su mga takyag, iniitaas asin iniibaba na baga boot lumayag okun patakoton su mga gamgam.
“Si Diego bago nagadan nagtaram nin latin na dai man tataong maglatin! Manggilantas kamo, mga parakasala! Kamo, dangan pang pinagadalan nindo asin hinahampak kamo huli kaiyan, dai kamo nakakataram nin latin, magkakagaradan kamo na dai makapagtaram kaiyan! An pagtaram nin latin biyaya nin Dios, kun kaya an Simbahan nagtataram nin latin! Ako man nagtataram nin latin! Paano? Isuhay daw nin Dios an karangahan na ini sa mahal nyang si Diego? Magadan daw, mapapabayaan nya daw na magadan na dai magtaram nin latin? !Dai mangyayari! Maluwas na bakong sandag an Dios, bakong Dios! Nagtaram, kun siring, nin latin, asin ta an siring na pangyari pinatunayan kan mga manunurat kan panahon na ito!” —Asin tinapus su saiyang mga pangenot na kataga nin sarong kabtang na napagalan nyang marhay asin ta saiyang inarog sa sarong bantog na.manunurat, na iyo si Kgg. Sinibaldo de Mas.
“Pinatataratara taka, kun siring, mapalad na Diego, kaomawan kan saiyang kaayonan! Panganinohan ka nin mga mabansay na gawégawé, maldlot sa kabantogan; mahoyo sa kadalisayan; makinuyogkuyog, alagad marigon an hoot; tapat na kaiwal; mapinatawad asin maugayon; mapalad asin marigon an boot; malodok asin dayutipot; daing-tinatago asin matitinubdon; mamomoton sa kabinian; madasig asin marigon; masosopgon asin malolot; maingat sa saimong mga kapakanan sa pagwawaras; maliksi sa kakayahan; masinonod sa marhay na kinaugalean; madonong, alagad matatakton; maugayon na padagos; mapanghimalos na mapuso; dukha huli ta katongdan, alagad mapaghubayd; masamwang sa pagkamatimol; daing-pakasabot, kaya boot makanood: linalang ka nin Dios tanganing mamatean mo an pagkamoot sa kabinian... Tabangi ako sa pagawit kan saimong mga kaomawan asin kan saimong ngaran na halangkaw pa sa mga bitoon asin maliwanag pa sa tala-init na nagbibirik sa saimong pamitisan!
