kabilogan kan sermon; masakit na masabotan asin su
predicador hararomon na gayo, siring sa sinabi ni Hermanang Rufa; sa bagay na siring, sayang su paghalat
kan mga naghihirinanyog nin bahigay sa pagtangis,
asin kominatorog giraray su condenadang makoapo
kan gurang na babaye.
Minsan siring, an kabtang na ini orog pang nagkaigwa nin mga bunga ki kan énot, minsan na lamang sa nagkakapirang naghihirinanyog.
Pominoon sa sarong Mana capatir cong cristiano na sinonod nin mga kataga nin tataramon, na dai mahimong ipalis sa ibang horon; sinambit su kalag, su Infierno, su mahal na santo pintakasi, su mga parakasalang indio asin su mga banal na mga Pading Franciscano.
“!Abobo!” sabi sa saiyang kaibahan kan saro sa duwang daing kagalangan na mga taga Manila; “griego iyan sakuya, mahalé ako.”
Asin kan makitang pirinto su mga tata, lominuwas sa kristiya sa dakulang pagngalas kan banwaan asin kan predicador, na namuti asin ominorong sa kabangaan kan saiyang kataga nin tataramon; may nagkapirang naghalat nin panelang pagkadagit; alagad si Padre Damaso nasengan na sundon lamang ito kan saiyang paghiling asin pinadagos su saiyang sermon.
Nangalatikat su mga panarangin laban sa kapanahonan sa pagkadaing-kagalangan, sa nagmomondag na pagtalikod sa katinubdan. Garong an bagay na ini an saiyang orog na pinagtitibayan, tara nagpahiling syang pinagpapasabngan asin marigon patin malinaw su saiyang mga ipinahayag. Sinambit su mga parakasala na dai nagkukurumpisal, na nagkakagaradan sa mga bilanggoan na dai nakapagarako nin mga sacramentos, su mga angkos na mga masumbikal, su mga moromestisong mga maabhawon asin mga soplado, su mga nagdodoronongdonongan na mga bagong-tawo, su mga filosofillo okun mga pilosopillo, su mga oroabogado, mga oroestudiantillo asin iba pa. Talastas an ugalé nin kadaklan na kun boot nindang pag-andakan (384) an saindang mga kaiwal: ginagamit nindang panakip an illo huli ta garong daing ibang ikinatatao an bagolbagol asin ta minaruluwas na mga magayagayang bulanos.
Nadadangog gabos asin nasasayodan ni Ibarra su
