Duman sa itaas, sa lindong na minagikan sa mga kahoy, mga sinarapong na mga burak asin mga wagayway, sarong dakulaon na polea na tolong (3) rueda nabibitay nin mga pisi asin nin ganchong batbat, tolong (8) cable na darakula pa sa iba, nagkakasorohot sa mga labot, asin nabibitay digdi an sarong sillar (389) na kinalogan sa tahaw, tanganing makatama sa kalog nin saro pang gapo, na itinonton na sa kalot, sarong sadit na ruwang na itinalagang rimposan kan salaysay kan panahon na ito, siring baga kan mga pahayagan, mga kasuratan, mga kuwarta, mga medalla asin iba pa, asin, sakalé, papaaboton sa haraloy pang mga ipapangaki. An mga cable na ini nagkakatoronton maghalé sa itaas paibaba, nababanggraw sa saro pang kasing-dakula na polea na natatakod sa poon kan aparato na iboborobod sa cilindro nin sarong torno na natatakod sa daga huli sa mga mahiribog na mga kahoy. An torno na ini na mapapahiro huli sa duwang (2) manubrio, minatao nin makasanggatos na kosog sa sarong tawo huli sa nagkapirang golong na may mga ngipon, minsan ngani an nakakamtan sa rigon, nasasayang sa rikas.
“Hilinga,” an sabi kan tawong madarag na pigpapabirik su manubrio: “hilinga, Nor Juan, na sa kosog ko lamang saktuyang itinotonton asin binabaton an dakilang gapo... Marayrahay na gayo an pagkapamugtak, mala ngani ta masosokol ko sa lambang totoro an paitaas asin an paibaba, mala ngani ta an saro katawo magpoon sa irarom makakasokmol kan duwang gapo alintanang pinagmamaneho ko maghalé digdi.”
Dai nin ibang maginibo si Nor Juan kundi pagtakahan an tawong ito na naghohoyom na gayo. May mga hororon asin mga kaomawan su mga masiniyasat dapit sa tawong madarag.
“Siisay nagtokdo saimo kan maquinaria?” hinapot sya ni Nor Juan.
“Su sakong ama, itong sakong ama!” an simbag na kasabay su napapalaén na saiyang hoyom.
“Asin sa saimong ama?”...
“Si Don Saturnino na apo ni Don Crisostomo.”
“Dai ko Aram na si Don Saturnino...”
“Oh! kadakol kan saiyang naaaraman! Bako sanang
