An mga ini asin iba pang mga bagaybagay ibinobugtak kan daing pagtubod na filosofo sa ngoso nin mga tawong tampalasan ngapit sa panahon. Sakalé, nalilibang si gurang Tasio, na madaleng mangyari, alagad magbalik kita sa satong ipinagoosip.
Sa mga kiosko na satityang nakita kasuhapon na ginamit kan paratokdo sa paadalan asin kan mga nagaaradal, hinahanda ngunyan an sarong masiram asin nagsasawang pamahawon. Alagad, sa latok na itinalaga sa mga nagraralabas, daing sarong botéllang arak, alagad dakol man su mga bungang-kahoy.—Sa enramada na minasogpon kan mga ito namumugtak su mga tukawan kan mga musikero asin sarong latok na patos nin mga dulce asin mga confitura, mga frasco nin tubig na may mga dahon asin mga burak na tagama sa mga napapdhang mga katawohan.
Su paratokdo sa paadalan nagpatindog nin kawayan, may mga balagbag, nagpabitay nin mga sarten, mga koron na gagaramiton sa mga maogmang karawat.
Su katawohan, na mga nagugubingan nin sa mga maogmang nagaaradal, nagkakabirinbin sa pagdulag sa saldang na nagaatak-atak, maging sa lindong nin mga kahoy, maging sa sirong kan palapala. Su mga barobata nagsarakat sa mga sanga, sa ibabaw nin mga gapo, tanganing mabarang nanggad ninda su ceremonia, sa siring na paagi nahipnoan su saindang hababang tindog; hiniling nin pagkauri su mga nagraralabas na, mga malinig asin mga marhay su panggubingan, nagkakamurugtak sa lugar na itinalaga sainda. Nagkakakeregyatan (894) su mga magurang: sinda, mga daing sikat na mga taga oma, magpapakakita sa saindang mga aki na magkaraon sa maputing mantel na haros siring kan cura asin kan alcalde. Igo nang isagiromdom lamang an siring na bagay sa pakalikay sa punaw, asin ta an siring na pangyari ipagbabareta magpoon sa mga magurang sagkod sa mga aki.
Dai pira nadangog an harayong togtog kan musica:
