pinangengenotanan nin mga maogmahon na mga pangkat na binibilog nin mga tawong nanonongod sa gabos
na mga panahon asin nagugubingan nin gabos na mga
kiray. Garo nang pigkakaluwasan su tawong madarag
asin inogid nin sarong paghiling su saiyang kagamitan.
Sarong pakikiaramon na taga langtad pinagsusunod su
saiyang paghiling asin pinagmamasdan su gabos nyang
ceremonia; huli kan saiyang salakot asin kan saiyang
panggubingan, haros dai namidbiran. Saiyang hininguha an pinakamarhay na kamugtakan, haros sa karani kan torno sa tampi kan kotkot.
Kairibahan kan musica su Alcalde, su mga may katungdan sa banwaan, su mga fraile, maliban ni Padre Damaso, asin su mga empleadong kastila. Nakikipagolayolay su Alcalde ki Ibarra, na saiyang naging kaugnay nin boot magpoon kan saiyang pataratarahon huli kan saiyang mga condecoracion asin mga banda, an mga alisngaw kan aristocrasia iyo an mga kaluyahan kan Saiyang Kahalangkawan. Si Capitan Tiago, su alcalde asin nagkapirang mga mayayaman nasa maogmang tompok nin mga daraga na may mga payong na sukla. Si Padre Salvi, siring sa giraray, daing gironggirong asin baga hararom an isinasaisip.
“Laomon mo an sakong pag-andorog kun mapapadapit sa sarong mabansay na gawé,” an sabi kan Alcalde ki Ibarra; “itatamo ko ika kan and man na saimong kaipuhan, asin kun dai, gigibohon ko na tamohon nin iba.”
Kan sinda naghaharaning magharani namatean kan hagbayon na nagkukurabkutab su saiyang puso. Daing ano-ano tinorohokan su kagigilantas na toytoy na natotogdok duman: nakita nya su tawong madarag na magalang na nagpataratara saiya asin madaleng ipinotitok saiya su paghiling. Napangalas sya kan saiyang matuklasan si Elias, na huli sa sarong makahologan na pagkirit napasabot nya na giromdomon su saiyang isinabing pataan sa simbahan.
Isinolot kan cura su mga sa pading damit asin pinonan su ceremonias; kapot kan buta-sa-ibong na sacristan mayor su libro asin su hisopo patin su bendita nagkakaraptan man nin sarong sadit na sacristan. Su iba, tirindog sa palibot turukas su mga kalo, daing girironggirong, tara, minsin ngani luhayluhay su pagbasa, namamaté na tinatakigan su tingog ni Padre Salvi.
