yan na hapon sa pagtao nin dangog sa sakong pagsadiri!"
Asin dominalagan dara su paisi asin su servilleta, alágad daing kaló, na pinagbobókod nin mga hagayhay asin mga hapot.
An bantulin na may maarabot na mga tulisan dai magkakaigwa nin labis na bungá.
"Alágad himatea tabi!—Noarin mádatong?—osipan mo kami!— ! Su Saiyang Kahalangkawan!"
Harayó na si Capitán Tiago.
"Madigdi su Saiyang Kahalangkawan asin sa harong ni Capitán Tiago madagos!" an sabi nin nagkapira na dai lámang pinaghonáhoná na itoon su aki asin su magiging manúgang.
"Tamang gayo, su pagkapili!" an sabi kaini.
Nagpahirilingan su mga fraile: An boot sabihon kan paghirilingan na ito: An Capitán General minagibo kan saró kan saiyang mga giribohón, nakalapas satúyá, sa convento kutá siya dapat nagdagós, alágad mantang siring an sa isip nin gabós dai nagkaraalo asin dai nin nagpahayag kan saindang iniisip.
"Isinabi na iyán sakó kasoodmá," an taramon kan Alcalde, "kundi dai pa kaito nabibilog su isip kan Saiyang Kahalangkawan."..
"Naaraman mo pó, señor Alcalde, kun gurano kahaloy an sa isip kan Capitán General na saiyang ipagdánay digdi?" an daing katiwasayan na hapot kan alférez.
"Bakong gáyong cierto; an Saiyang Kahalangkawan namumuyang magpangalás."
"Uya igwa pa nin ibang mga paisi!"
An mga ito sa Alcalde, sa alférez asin sa gobernadorcillo na siring man giráray an ibinabaretá, natalastas na marhay kan mga fraile na dai lámang nin sa cura. "An Saiyang Kahalangkawan mádatong sa ika-apat na horas nin hapon!" an sábing gayo kan Alcalde "moninong kitang makakapagkaraon!"
Dai makakataram nin orog pa karahay si Leonides sa Termópilas: "Ngunyan na banggi mamanggi kita kaharampang ni Plutòn!"
Nakabalik sa dáting lakaw su orolayólay.
"!Natatago — dai ko an satúyang dakúlang predicador!" an may katakutan na sabi nin saró sa mga empleado, na mahoyó su panglawog, na dai lámang binuka su ngosó sagkod kan horas nin pagkaon, asin iyo
