doan sa sarong bilanggoan, na nagmamawot na makakogos saindo, naghahanap nin sarong magranga saiya. Daing kaibahan, naghehélang, alintanang kamo sa ibang dagá... nadadangog nindo na pinaglanghadán su saíyang ngaran, nákoa nindo su linobngan saiya daing laog kan muya kamong mangadyé dumán? Bakó? Dai kamo nagkaraalo, !kun síring pinahámak nindo sya!"
Ibinikyaw su takyag; sarong binibiní, marikás na gayo síring sa liwanag, pominatáhaw asin pinógol su mapanghimalos na takyag kan saíyang mayomhok na mga kamot: sya si María Clara.
Hiniling sya ni Ibarra nin sarong paghiling na garong nagagalinawan kan karongawan. Sa diit-díit tominoros su saíyang gorogom na mga moró kan saíyang mga kamot na pinabayaan na mabagsak su lawas kan franciscano asin mahólog su cuchillo, asin, pakapanáhob sa pandok, dominolag sa táhaw kan kadaklán.
MGA SARABISABI
Madaleng nakalakop sa banwaan su nangyari. Sa kapinonan dai nin boot maniwalá, alágad, sa pagsokó sa katotoohan, gabós nangaghagayhay na gayo sa pagtaka.
Lambang saró nagsabisabi sunod sa kutod kan saiyang pakánood.
'!Gadán si Padre Dámaso!" an sabi nin nagkapira; "nagroronggáhay nin dugó su pandok pagbuhata asin dai naghahangos."
"Magpahingaló na logod sya sa katiwasayan, alágad dai man syang ibang ginibo kundi magbayad kan saíyang útang!" an pahayag nin sarong hagbayon. "Hilinga nindo ta daing ngaran su ginibo ngunyan na aga sa convento."
"Anong ginibo? Kinolog namán su coadjutor?"
"Anong ginibo? Aber! Baretáe daw kami."
"Nakahiling kamo ngunyan na aga nin sarong mestísong kastilá na lominuwas sa kristiya sa laog kan sermón?"
"Ohó! ohó nakita nyamó. Pinotitukan ito ni Padre
