Hominiró si Társilo asin itinonton sya liwat. Su saíyang alobaob naginánay na magkípot su saíyang alintatawo nakatingkálag sa lángit saén nagpapalayag an mga mapupúting panganoron; tinitikó su líog tangáning makapagpadagos nin paghiling kan liwanag kan aldaw, alágad dai nahaloy lominobog namán giráray sa túbig, asin an mga hilingon sa kinaban linipdan saiya kan masumbíkal na itong telón.
Nakalihis nin sarong minuto; sa pagmasid kan Musa nakahiling sya nin darakúlang boró-boró na nagiiritaas.
"!Napapahá!" an sabi na nagngingisi.
Asin nagbalik ulí na mahímong su túbig.
Ngunyan nagdánay nin sarong minuto may kabangá asin su alférez nagtao nin sarong tandá.
Bakó nang tirinting su lawog ni Társilo; su mga burukabukang alobaob nagpapahiling kan kaputían kan mata: sa ngosó may nagluluwas na túbig na malaboy asin may digtang dugó; naghohoyophoyop su malípot na doros; alágad dai na nangingibigkibig su saíyang lawas.
Su gabós nagpahinirilingan daing mga girong, mga malungsí asin nagkakaharandal. Tominao nin tandá su alférez tangáning iibabá ito asin hominalé na baga may iniísip; nagkapira doopi ni Doña Consolación su mga paa na hurubá kan após kan saiyang tabakó, alágad dai nangirogkirog su háwak asin ta napárong su kalayo.
"Naglamós sa saiyang sadiri!" an sabi sa hababang tíngog nin sarong cuadrillero; "hilinga an kamugtakan kan dilá na baga boot nyang halonon."
Pinaghilinghíling kan sarong bilanggó su pangyayari na tinatakigan asin dinadaraplós; síring sa sarong róngaw nakalákop su saíyang paghiling.
Ipinamahalá kan alférez sa directorcillo an paghapot saiya.
"Señor, señor," an sabi na nagsisiloksigok; "sasabihon ko an gabós na muya nindo!"
"Marahay! hilingón ta: siisay mo ngaran?"
"!Andong pó!"
"Bernardo... Leonardo... Ricardo... Eduardo... Gerardo... o anó?"
"!Andong pó!" an simbag liwat kan mangmang.
"Bugtaki nin Bernardo o minsán anó," an pinagmar-
