su saíyang duwang kambal, iyoiyo nyang mga akí.
Itoon dumán su babáyeng panugangan kan parasákat nin nyog; dai naghihibí; naglalakawlákaw, nagboborobisngag su dongó, kaloskós su takyag asin pinagtatalumpatían su mga tawo.
"Nakakita na kamo nin síring na bagay? Dakopón si Andong ko, badilón, ibugtak sa pandog asin darahon sa cabecera, huli sana ta ... ta igwa nin mga bagong kataingan? An síring na bágay naghahágad nin panghimalos! Nakalabi na an mga Guardia Civil! Isinosumpá ko na, kun masompongan ko liwat an siisay man sainda na naghahanap nin sarong lugar na retirado sa sakong lagwerta, síring sa paráting mangyari, babararían ko, babararían ko! okun dai. . . ako an bararían!!!"
Alágad kadikit na tawo an mga oyon sa musulmánang panugangan.
"Ini gabós salá ni Don Crisóstomo," an hagayhay nin sarong babaye.
Naglalakawlákaw man su paratokdó sa paadalan kasarálak kan katawohan; dai na pinaghohorohaprós ni Nor Juan su saíyang mga kamot, dai nya dara su saíyang plomada mani su saíyang metro; itom su solot kan tawo, tara nakádangog sya nin mga maráot na baretá, asin tapat sa saiyang kaugalean na hilingon an omaaboton bílang sarong bagay na nangyari na, pinagitoman na nya an kagadanan ni Ibarra.
Ikaduwang oras nin hapon sarong carro na bukás, góyod nin duwang vaca, ominontok sa tangod kan tribunal.
Pinalibotan kan mga tawo su carro, boot nindang longkasán asin laglagón.
"Hare kamo paggibo kaiyán," an sabi ni Kapitánang María; "muya nindo sindang magralakaw?"
Napogolan kaini su mga angkos. May nagruluwas na duwang pólong soldados asin pinalibutan su lunadán. Nagruluwas su mga bilanggó.
Enot si Don Filipo, nagagapus; pinataratara na nakahoyom su saíyang agom. Si Antonio, su akí ni Kapitánang María, tominonga naghihibing garong akí, na nakapanganá lámang kan kuráhaw kan saiyang angkos. Hominoyaw si Andong na mangmang kan makita su saiyang panugangan na babaye, na iyong ginikanan kan maráot nyang pálad. Si Albino, su ex-seminarista,
