ay! Ntra. Sra. de Novaliches!"
"!Nanay!" an simbag kan kangohodan sa mga aki.
"!Nagsabi na ako saimo!" an padagos kan babaye sa tingog na naghihimásol; "Inagsabi na ako saimo! ay! Virgen del Carmen, ay!"
"Alágad dai kang sinabing anó man sakuyá!" nagáhas na somimbag na nagtatangis si Capitán Tinong; "atá ngani pinagsasabihan mo ako na marhay an sakong ginigibo sa paráting paghalyaw sa harong ni Capitán Tiago asin pagpadánay kan saiyang pagkakatóod huli ta... huli ta mayaman...asin sinabihan mo ako na..."
"Anó? anong sinabi ko saimo? Dai ako kaiyán nagsabi saimo, dai akong sinabi saimong anó man! ay! kun naghimaté ka lámang sakuyá!"
"!Ngunyan ako an sinasalá mo!" an simbag sa mapait na tingog, na tinaptap sa alindoonán kan sillón. "Bakong nagsabi ka sakuyá na marhay an sakong ginigibo sa paganyaya saiya na magkaon digdi satuyá, huli ta mantang sya mayaman sabi mo na dai kita dápat makipagkatóod kundi sa mga mayaman lámang?!!Abaa!"
"Totoo ngani na sinabihan ko ika kaiyán huli ta . . .huli ta dai nang bolong; dai kang ibang ginigibo kundi magómaw saiya; Don Ibarra digdi Don Ibarra dumán, Don Ibarra minsan saén,! abaa! Alágad hinatolan ko ika na dai ka makipagkita, dai ka man makipagólay saiya sa katiripunan na ito, dai ka kaini makasuhay sakuyá."
"Naaraman ko daw na máduman sya?"
"Dápat kutang nakaáram ka!"
"Paano, na dai ko ngani sya kaito midbid?"
"Dápat mo kutang namidbiran sya!"
"Alágad, Tinchang! iyo pa sana ito na an pagkakita ko saiya, iyo pa sana ito an pagkaonabihi saiya!"
"Súkat nang namidbid mo sya kaito pa, nádangog mo na kutang pagorolayan sya, huli kaiyán saró kang lalaki, asin may pantalón ka asin nagbabasa ka kan El Diario de Manila!," an dai mapapalop-ong simbag kan agom na babaye, na hiniling sya nin mangirhat na paghiling.
Dai nakasimbag si Capitán Tinong.
Si Kapitanang Tinchang dai pa nasisinangan, sa siring na tagumpay, boot na mamakon nanggad sya, asin
