malipungaw sa énot; su alférez an makasangribo na pagbaretá kan saíyang pagtalad sa labanan, na hiniling sa ibabaw kan saiyang abaga su kagabsan, sa pagloba na sya sarong Don Juan de Austriá: ngunyan teniente sya na may gradong sa comandante; si De Espadaña an minahiling saiya nin magálang asin matákot na paghiling asin linilikayán an saiyáng paghiling, asin si Doña Victorina na angot. Dai pa minaabot si Linares tara, huli ta sya tawong mahalaga súkat syang mahuri sa iba; may mga tawo na mga matitinubdon na mahuri lámang nin sarong horas minaluwas na sindang mga dakúlang tawo. Sa tompok nin babaye si Maria Clara an pinanonongdan kan huringhuding; pinataratara asin naináko sinda kan daraga siring sa kinaugalean, na dai man nahaléan saiyang mamondong kamugtakan.
"Psh!" sabi nin sarong daraga; "mapaabhawon..."
"Magayón" an simbag kan saró, "alágad pominili kutá sya nin sarong bakong gáyong sa mangmang an pamandok."
"An bulawan, Nini; nagpabákal sa saiya mansana su hagbayon."
Sa ibang tompok sinasabi man: "Magpakasal ngunyan na bibitayan su énot nyang katipan!"
"Iyan inaapod kong sa maálam, handá an isasalihid."
"Tara kun mabalo..." An mga orolayólay na ini namamati gayod kan da- raga, na nagtutukaw sa sarong silla nagpapakarhay nin mga búrak sa sarong bandeja, tara nakikita na tinatakigan su saiyang kamot, nanglulungsi asin makapira kagata su saiyang ngabil. Sa tompok nin mga lalaki sa halangkaw na tingog su pagorólay, asin talagang mapádapit na mga huring pangyayari. Su gabós nagtatararam, sagkod si Don Tiburcio maliban ki Padre Sibyla na nagiingat kan saiyang mapanumbikal na dai paggirong. "Nádangog ko na babayaan kan Saimong Pagkaigagalang an banwaan, Padre Salvi?" an hapot kan bagong teniente na huli kan saiyang estrella naging orog kamagkakanigó nin pagmahal.
"Dai na akong gigibohon dumán, maolakit akong padagos sa Manila... asin ika?"
"Babayaan ko man an," an saiyang simbag na kana-
