!Kun banggi sarong misterio! . . . Su anílag nyang babahan,
napapatos na banáyad riboríbong mga ilaw;
an simuy minaarúngay192, nasaga an kalangitan,
mga alon na hagayhay an doros inoosipan,
salaysay na nawará na nin panahón na harúkay.193
Sabi ibinabaretá su énot na daliwawa,
énot na hadok kan aldaw kan bugtak nagpagaraba,
riníbong dai tibáad sa daing-saysay nagtunga,
pinaranó su angpas, alitoktok pinagsadya,
asin man na póok su hadok tinatalá na.
Kundi kun bangging madiklom an mga doros aranggot,
panglinggilinggi napoón dí mapaontok na balod,
an angkasa194 iagihan tingog na katakotákot,
sanong, tingog, arangay na bagang sayod
irinuluwá su kan énot sa dágat sa dagat nagkarolobog.
Kung siring nakalatikat an búkid195 sa alitoktok,
mga kahoy nagpupúay magibongibong na sógod;
mga hayop nag-oóngal, kahiwasan natatanyog,
espiritus nagsasabi sa tanáyad marologsot,
inapod kan mga gadan sa dúlang 196 katakotákot.
An banggi nangagtataghoy, malíbong, makangingirhat;
hidyaw, bughaw man na láad nagkakalayo sa dágat;
pagrani kan daliwawa tiwásay nábalik liwat,
asin sarong mapangahas balakwitan na pangdágat,
minapoón nin paglibot sa napapagal na ombak197.
Síring an agi kan aldaw madiklom kong pailihan,
pinahalé sa kinaban kadto dati kong ontokan;
kan pangbihira kong pálad soripot sakong pigtakhan:
!pinabay-an na batiris, lómot an horot ko lámang,
kan baláog sa sakuyá sa pagtagó sa kagabsan.
_______
- 192 Minaamyo.
- 193 Kahalawigan.
- 194 Atmósfera.
- 195 Daging na nagkakálat.
- 196 Banquete; festin.
- 197 Alon.
