61 Asin dudumán si Maria Magdalena asin an sarong Maria, nagtuturucao sa togñod nin lolobgñan.
62 Sa sominonod na aldao, na iyo an pacatapus nin paghahanda, an magña poón nin magña sacerdoto asin an magña Fariseo nagtiripon qui Pilato,
63 na nagsarabi, Cagurangnan, naromdoman mi na idtong madaya nagsabi can nabubuhay pa, Paca-agui nin tolong aldao mabubuhay acó liuat.
64 Ipinagboót gñani na higñatan an lolobgñan sagcod sa icatolong aldao; tibaad sa bangui magdirigdi an saiyang magña discipulo, asin hâbonon sia, asin magsarabi sa banua, Nabuhay sia sa magña gadan, asin an nahuring salâ orog pa qui sa naenot.
65 Sinabihan sinda ni Pilato, Iguá camó nin sarong parabantay; padumán camó, higñatan idtó nindo nin marahay siring sa pacasabot nindo.
66 Sinda gñani nagduruman, asin pinaghigñatan an lolobgñan can para-bantay, tinandaan pa an gapó.
1 Sa catapusan can aldao nin paghigñaló, atab pang gayo an caagahan can naenot na aldao nin semana, nagdirigdi si Maria Magdalena asin an sarô pang Maria ta maghiling can lolobgñan.
2 Asin uya digdi na nangyari an macosog na linog; huli ta an sarong ángel nin Cagurangnan na guican sa laguit, asin can pagdatong, pinocan an gapô sa pinto nin lolobgñan, asin tominucao sa ibabao nia.
3 An saiyang lauog siring sa sarong quiquilát, asin an saiyang gubing naputi pa sa alopoop:
4. asin sa tacot saiya can magña para-bantay pinagtaraquigan, asin nani sinda na garong magña gadan.
5 Asin nagsimbag an ángel, na sinabihan an magña babaye, Day camó magcataracot, huli ta naaaraman co na hinahanap nindo si Jesús, an ipinacó sa crúz.
