14 Itinaó co sa sainda an saimong tataramon; asin an quinában iquinaogñis, sinda, huli ta baco sindang taga quinâban, siring sa sacó man na bacong tagá quinában.
15 Day co ipinaquiquimaherac na halĉen mo sinda sa quinâban, cundi ilicay mo sinda sa maraot.
16 Sinda bacong magña tagá quinâban, siring aco man na bacong tagá quinában.
17 Pacabanalon mo sinda sa saymong catotoohan: an saimong tataramon iyo an catotoohan.
18 Siring sa pagcasogo mo sa sacô sa quinâban, siring man an pagcasogó co sa sainda sa quinában.
19 Asin dahel sa sainda acó nagpapacabanal sa sacong sadiri, ta gñaning sinda man magpacabanal sa catotoohan.
20 Naquiquimaherac acó bacó saná dahel caining magña ini, cundi caidto man na magña magtuturubod sa sacô dahel sa saindang tataramon;
21 ta gñaning sinda gabos magcasararo; siring saimo, oh Amâ, icá sa sacó, asin acó sa saimo, ta gñaning sinda man mani sarò sa satô; ta gñaning an quinâban magtubod na sinogo mo acó.
22 Asin an caurauayan na itinaó mo sa sacô, itinaó co sa sainda; ta gñaning sinda mani sarô, siring sa satô na sarô:
23 acó sa sainda, asin ica sa sacó, ta gñaning sinda maanas na gayo na magcasararô; ta gñaning mamidbid nin quinàban na acó sinogo mo, asin namôtan mo sinda, siring can pagcamoót mo sa sacô.
24 Amâ, boót co man na idtong magña itinaó mo sa sacô, cun saèn acó, dudumán sinda, ta gñaning mahiling ninda an sacong camurauayan, na itinaó mo sa saco: huli ta namotan mo acó na day pa linalang an quinâban.
25 Oh Amang banal, an quinaban day ca namidbid; alagad acó nacamidbid sa saimo, asin ining magña ini nacamidbid na sinogò mo acó.
26 Asin ipinamidbid co sa sainda an saimong gñaran, asin ipamimidbid co; ta gñaning an pagcamoót na iminoót mo sa sacô, mapa-sainda, asin acó sa sainda.
