8 Asin saróng tauo sa Listra, na day nacacaherô an magña bitis, nacatucao, pilay poón pa sa tulác nin saiyang ina, na casoarin pa man day nacalacao.
9. Ini nadagñog si Pablo na nagtatarám; itinorohoc nia sa saiya an saiyang magña matá, asin nahiling na may pagtubod ta gñaning mapaomayan,
10 sinabihan sa daculang tigñog, Tomindog cang matanos. Asin lominocsó, asin lominacao.
11 Asin an magña cadaclán, pagcahiling can guinibo ni Pablo, nagcurahao sinda, na nagsarabi sa tataramon nin Licaonia, Magña Dios na nacacaomaguid sa magña tauo naghirilig sa sato.
12 Asin si Bernabé pinag-arapod nindang Júpiter, asin si Pablo, Mercurio, huli ta sia an nagdadará can tataramon.
13 Asin an sacerdote ni Júpiter, na an saiyang templo nasa atubang nin ciudad ninda, nagdaráng magña toro asin magña guirnaldas* sa atubang nin magna pinto, asin boót ninda sindang dolotan nin atang, caiba nin magña cadaclán.
14 Alagad can madagñog ini can magña apóstol na si Bernabé asin si Pablo, guinisi an saindang magña gubing, asin nagdaralagan sa tahao nin catauohan, na nagcucurahao,
15 asin nagsarabi, Magña lalaqui, tâdao ta guiniguibo nindo an bagay na ini? Camí magña tauo man na siring sa saindo, ibinabaretâ mi sa saindo an evangelio, ta gñaning sa magña bagay na ini na daing halagá magbaralic an magña boót nindo sa Dios na buhay, na gumibo an lagñit, asin an daga, asin an dagat, asin an gabos na magña nasa sainda:
16 Na sia sa magña panahon na nacaagui-na, pinabayaan an gabos na magña tauo na magralacao sa saindang magña sadiring dalan;
17 minsan giani, day pinabayaan na day magcaiguá nin sacsí, dapit sa saiya, guinibohan nin magña carahayan an gabos, asin tinauán quitá nin magña orán na halè sa lagñit, asin magña panahon na tig-bugñahan, na pinanô an satong magña puso nin cacanon asin nin caogmahan.
- Magña coronang borac.
