15 Alagad sa anoman caini day aco nacapaquinabang: day coman isinurat ini tagñaning siring an guibohon sa sacuyá; háros ta pinagmamarbay cong orog na magadan, bago na siysay man pahamacan an camurauayan cong ini.
16 Alagad minsan gayod marhay na nagbubulalas aco can Evangelio, day aco nin anoman na icacapanagsag; háros ta naipuhan na ipinagboot sa sacuyá; asin, ¡herac man sa sacuyá con day aco magbalagñibog can Evangelio!
17 Nin huli caiyan, con guibohon co iyan sa puso, magcacaigua aco nin balos; alagad con sa pirit, an pagpatauad itinogon sa sacuyá.
18 ¿Cayá ano dao baga an balos sa sacuyá? Na sa paghulit co can Evangelio, ibugtac co an Evangelio ni Cristo day nin halaga sanang bayad, tagñaning day co gamiton sa maraot an sacuyang capangyarihan dian sa Evangelio.
19 Nin huli caiyan, minsan ó huli ta libre ó hiuas aco manogñod sa gabos, nagpaoripon aco sa gabos sa pacapagpaquinabang nin orog ó sa pacasadol sa iba pa.
20 Nagui acong sa magña judio siring man sa judio, huli sa pagsáró co can boot nin magña judio; sa magña nasasacopan can togon ó ley (minsan aco bacong sacop can ley) siring bilang baga aco sa nagpapasacop sa ley, sa pacasadol sa magña nasasacopan can ley;
21 Sa magña day nin ley, siring sa aco day man nin ley, (na minsan yaon aco sa day nin catogonan ó ley nin Dios, condi dian sa catogonan ni Cristo) sa pacasadol sa magña day nasa sa catogonan.
22 Nagui acong maluluya man, manogñod sa magña maluluya, sa pacasadol man sa magña maluluya: Sa gabos magui acong bilog ó anoman na bagay, tagñaning sa gabos na camugtacan icaligtas co an magña iba man ó nagcapipira.
23 Asin ini guiniguibo co dahel can Evangelio, huli ta guinibo co sa caibahan caiyan na maquinabang.
24 Day camo nacacaaram na an gabos na nagdadalagan sa dalan na pasohan, an gabos sa catotoohan anan na nagdalagan, alagad saró sana an may premio ó paquinabang? Domalagan camo sa bagay na macapagcamit camo caiyan.
