alagad nabubuhay huli sa cabagsican nin Dios. Cayá cami man anan na magña maluluya sa cadamay niya, alagad magcacaburuhay cami sa caibahan niya huli sa cabagsican nin Dios manogñod sa saindo.
5 Maghorop-horop camo sa saindo man sana con baga namumugtac camo sa pagtubod; magbaló ó magpatotoo camo sa saindo man sana. ¿Day camo nacacamidbid sa saindo man sana, na si Jesucristo yaon sa saindo? con baga bacó na camong alang-alang ó day pinapagcanigó.
6 Alagad linalaom co na macamidbid camo na camo bacó nang magña day pinapagcanigó.
7 Asin namimíbí cami sa Dios na day camo macaguinibo nin anoman na maraot; bacó ta gñaning camo papagcanigóon, condi tagñaning camo gomibo caitong marhay, minsan cami maguing siring sa magña day pinapagcánigó.
8 Háros ta day cami macacahimo nin anoman na bagay na tumang sa catotoohan, condi huli sa catotoohan.
9 Nin huli caiyan nagoogma cami na magui caming magña maluluya, asin na camo magña macosog; asin minamauot pa niamo an saindong lobos na carahayan.
10 Cayá isinusurat co ini sa saindo na daday aco dían, huli tagñaning day co masabi sa cacurihan con didian aco, siring sa capangyarihan na itinao sa sacuyá nin Cagurangnan manogñod sa icacarahay, asin ta bacong sa pagcalaglag.
11 Nagcuculang, magña tugang, na magcaigua camo nin caogmahan, magpacasangcap ó magpacarahay camo, magcacaigua camo nin caragñahan, magñagmaté camo nin saró sanang bagay, magcacaigua camo nin catiuasayan; asin an Dios nin catoninogñan asin pagcaherac mapapa saindo.
12 Magpagaralang-galang camo camo man sana sa paghadoc na banal. An gabos na magña santos ó banal minataong galang sa saindo.
13 An biyayá nin Cagurangnan na si Jesucristo, asin an pagcamoot nin Dios asin an paropaquinabang nin Espíritu Santo mapasaindo ó macamtan nindo gabos. Auot pa.
