mga petisyon para sa certiorari, prohibisyon, mandamus, quo warranto, asin habeas corpus.
(2) Magrepaso, magrebisar, magbaliktad, o mag-apirmar sa apelasyon o certiorari, siring kan pwedeng itao kan ley o mga Reglamento kan Korte, ultimong mga pagdesisyon asin mga orden kan hibabang mga korte sa:
(a) Gabos na mga kaso na an konstitusyonalidad o pagkabalido ka arin man na treaty, internasyonal o ehekutibong kontrata, ley, dekrito presidensyal, proklamasyon, orden, instruksyon, ordinansa, o regulasyon pinaghahapot.
(b) Gabos na mga kaso na imbwelto an legalidad kan arin man na bwis, singil, tasasyon, o tol, o arin man na penalidad na pigpapataw manungod digdi.
(k) Gabos na mga kaso kung haen an hurisdiksyon kan arin man na hibabang korte an nasa kustyon.
(d) Gabos na mga kasong kriminal kung haen an penalidad na pigpapataw iyo an reklusyon perpetua o mas halangkaw pa.
(e) Gabos na mga kaso kung haen an kustyon o imbwelto iyo sana an manungod sa ley,
(3) Magkaag nin temporaryong mga huwes sa mga hibabang korte sa ibang lugar kun kaipuhan sa karahayan kan publiko. An nasabing temporaryong pagdestino kaipuhan dai masobra sa anom na bulan kun daing pag-oyon an nanunungdan na huwes.
(4) Mag-orden sa pagliwat nin venue o lugar kan bista tanganing malikayan an salang pagpalakaw kan hustisya.
(5) Magmukna nin mga reglamento manungod sa proteksyon asin pagpapasunod sa mga diretsong konstitusyonal, pleading, praktis, asin prosidimyento sa gabos na mga korte, an pag-aku sa pagpraktis kan pagka-abogado, Integrated Bar, asin asistensya legal para sa mga daing sukat. An nasabing mga reglamentos kaipuhan magtao nin simple asin bakong magastong prosidimyento para sa madaling pagdesisyon sa mga kaso, na kaipuhan parareho sa gabos na mga korteng pareho an grado, asin kaipuhan dai inaan, dagdagan o liwaton an mga importanteng diretso. An mga Reglamento nin Prosidimyento kan mga korteng espesyal asin quasi-judicial na mga korte kaipuhan magpadagos sagkod dai pinagdisaprobaran kan Korte Suprema.
