(6) Magnombrar kan gabos na mga opisyal asin mga empleado kan Hudisyaryo segun sa Ley kan Serbisyo Sibil.
Sek. 6. An Korte Suprema kaipuhan magkaigwa nin superbisyon administratibo sa gabos na mga korte asin sa mga empleado kaini.
Sek. 7. (1) Daing persona an pwedeng manumbraran na Myembro kan Korte Suprema o sa arin man na hibabang mga korte kun siya bakong tubong-aking syudadano kan Pilipinas. An sarong Myembro kan Korte Suprema kaipuhan kwarenta anyos an edad, asin sa laog nin kinseng taon o mas pa nagin huwes nin sarong hibabang korte o nagpraktis nin abogasya sa Pilipinas.
(2) An Kongreso kaipuhan itao an mga kwalipikasyon kan mga huwes sa hibabang mga korte, pero daing tawong pwedeng manumbraran na huwes sagkod bako siyang syudadano kan Pilipinas asin myembro kan Bar.
(3) An sarong Myembro kan Hudisyaryo kaipuhan sarong taong midbid an abilidad, integridad, paghonesto asin igwang sadiring prinsipyo.
Sek. 8. (1) An Hudisyal asin Konseho nin Bar mumuknaon sa irarom kan superbisyon kan Korte Suprema na kompwesto kan Pamayong Mahistrado bilang ex-officio na Tagapamayo, kan Minister kan Hustisya sagkod kan sarong delegado kan Kongreso bilang ex-officio na mga Myembro, kan sarong delegado kan Integrated Bar, kan sarong propesor sa ley, kan sarong retiradong Myembro kan Korte Suprema, asin kan sarong delegado sa pribadong sektor.
(2) An regular na mga myembro kan Konseho kaipuhan nombraran kan Presidente sa terminong apat na taon, na igwang konsentimyento an Komisyonsa Pagnombrar. Sa Myembrong naenot na nombraran, an delegado kan Integrated Bar kaipuhan magserbisyo sa laog nin apat na taon, an propesor kan ley sa laog nin tolong taon, asin an retiradong Mahistrado sa laog nin duwang taon, asin an delegado kan pribadong sektor sa laog nin sarong taon.
(3) An Klerk kan Korte Suprema kaipuhan iyo an Sekretaryong ex-officio kan Konseho asin kaipuhan iyo an magtago kan rekord kan mga prosidimyento.
(4) An regular na mga Myembro kan Konseho kaipuhan magresibe nin sweldo na dedeterminaran kan Korte Suprema. An Korte Suprema kaipuhan magtao kan taunan na badyet na aproprasyon para sa Konseho.
