dai kaipuhan, sobra-sobra, maluho o bakong tama.
Sek. 3. Daing ley na dapat ipasar na sa ano pa man na paagi napapaluwas sa hurisdiksyon kan Komisyon sa Awdit an arinman na entidad kan gobyerno o sanga kaini manungod sa anuman na pangangapital nin kwarta kan banwa.
Sek. 4. An Komisyon kaipuhan magsumitir sa Presidente asin sa Kongreso, sa laog nin panahon na itatao kan ley, kan taun-taon na report na sakop an kamugtakan asin pagpapalakaw sa kwarta kan Gobyerno, kan mga parte, mga sanga, asin mga instrumentaliti kaito, kairiba an mga korporasyon sa sadiri o kontrolado kan gobyerno, asin kan mga entity na bakong sa gobyerno, segun sa awdit kaini asin magrekomendar nin mga paagi na kinakaipuhan tanganing mapakarahay an pagiging epektibo asin episyente kan mga ini. Ini dapat magsumitir kan siring na iba pang mga report na pwedeng kaipuhan kan ley.
Seksyon 1. An mga subdibisyon teritoryal asin politikal kan Republika kan Pilipinas iyo an mga probinsya, mga syudad, mga banwaan, asin mga baranggay. Kaipuhan magkaigwa nin mga rehyon awtonomus sa Muslin Mindanao asin sa mga Cordillera segun sa itinatao digdi.
Sek. 2. An mga subdibisyon teritoryal asin politikal kaipuhan magkaigwa nin awtonomyang lokal.
Sek. 3. An Kongreso kaipuhan gumibo nin ley nin sarong kodigo kan gobyerno lokal na magtatao sa paagi nin sarong sistema nin desentralisasyon na igwa nin epektibong paagi sa pagbawi nin katong dan, inisyatibo, asin reperendum, magbaranga sa iba-ibang yunit kan gobyerno lokal kan saindang poder, mga responsabilidad, asin mga rekurso, asin para sa mga kwalipikasyon, eleksyon, nombramyento asin paghale, termino, mga sweldo, mga poder asin gigibuhon kan lokal na opisyales, sagkod gabos na iba pang bagay manungod sa organisasyon asin palakaw kan mga lokal na yunit.
