prayoridad an pagmukna nin mga leyes na magtatao nin proteksyon asin pagpaasenso kan mga deretso kan kagabsan na magkaigwa nin makataong dignidad, marhay na pagkabuhay sosyal, ekonomiko sagkod politikal, asin mahale an mga inhustisyang kultural sa paagi nin ekwitableng distribusyon kan kayamanan asin poder politikal para sa
karahayan kan kagabsan.
Manungod sa kamawotan na ini, an Estado kaipuhan magmukna nin ley sa pagkua, pagsadiri, paggamit, asin pagpabakal kan mga sadiri sagkod sa pagbaranga kan mga ganansya kaini.
Sek. 2. An pagpapakarhay kan hustisya sosyal kaipuhan kaiba an kamawotan, sa pagmukna nin mga oportunidad ekonomiko segun sa katalingkasan sa inisyatibong paghingwa asin pagtiwala sa sadiring kakayahan.
Seksyon 3. An Estado kaipuhan magtao nin kumpletong proteksyon sa trabahador, sa lokal man o sa ibang nasyon, organisado o bakong organisado, asin padakulong an empleo, asin pantay na oportunidad sa empleo kan kagabsan.
Kaipuhan garanteyahan kaini an mga diretso kan mga trabahador sa pagporma nin sadiring organisasyon, an pinagsarong pakipagkasundo asin an kolektibong pakipagnegosyar asin diretso sa matoninong na pagwelga segun sa ley. Kaipuhan maasegurar ninda an pagkaigwa nin permanenteng trabaho, marhay na kondisyon kan lugar na pinagtatrabahuan, asin hustong sweldo. Kaipuhan sinda magpartisipar sa pagpapalakaw asin pagdesisyon na apektado an saindang mga benepisyong itinatao kan ley.
Kaipuhan protehiron kan Estado an pantay na prinsipyo sa pagtao nin responsibilidad sa mga trabahador asin tagsadiri sagkod an preperensyal na paagi sa pagresolber sa dai pagkasinarabutan, kaiba an konsilyasyon, asin kaipuhan ipasunod an pantay na pagsunod ninda digdi tanganing magkaigwa nin katoninongang industriyal.
Kaipuhan magtao nin reglamento an Estado manungod sa relasyon kan mga trabahador asin mga tagsadiri sa parehong pagbanga kan ani o ganansya sa produksyon asin an deretso sa negosyo na magkaigwa nin rasonableng ganasya sa saindang pangangapital, asin an pagpadakul sagkod an pagpatalubo kaini.
