sira sa paggamit nin tamang teknolohiya asin pagsiyasat, hustong tabang na pinansyal, sa produksyon, asin asistensya sa pagpapabakal sa merkado, asin iba pang mga serbisyo. An proteksyon kaipuhan maekstendir sagkod sa mga kadagatan na pigkukuwaan kan saindang ikinabubuhay kontra sa pakikiaram o paglaog kan mga estrangherong parasira. Kaipuhan makua ninda an hustong kahirasan sa mga pakinabang sa kayamanan kan katubigan asin kadagatan.
Sek. 8. Kaipuhan magtao nin mga insentibo an Estado sa mga tagsadiri nin daga sa pangangapital na hale sa nakuang bayad sa programang agrarian sa pagpauswag kan industryalisasyon, pagpundar nin mga empleo, asin pagbugtak sa pribado kan mga negosyong hawak kan publikong sektor. An mga instrumento pinansyal, na ginamit bilang bayad sa saindang mga daga kaipuhan onrahon bilang kolateral sa mga negosyong gusto nindang laugan.
Seksyon 9. An Estado, segun sa ley asin para sa karahayan kan gabos, kaipuhan maggibo, sa pakikooperar sa pribadong sektor, nin padagos na programa nin reporma sa dagang urban asin sa pagpapaharong na pwedeng makua sa hababang kantidad an sarong desenteng harong asin an mga kinakaipuhan na mga serbisyo para sa mga daing sukat asin mga syudadanong daing harong sa mga sentrong urban o mga lugar na babalyuhan. Kaipuhan man na padakulon an oportunidad sa hustong empleo sa nasabing mga syudadano. Sa pag-implementar kan nasabing programa, kaipuhan respetaran kan Estado an mga diretso kan saradit na mga tagsadiri nin propyedad.
Sek. 10. Kaipuhan dai haleon o gabaon an mga harong kan mga pobreng nageeristar sa urban o rural, apwera sana kun ipigboboot kan ley asin sa paaging makahustisya sagkod makatao. Dai dapat gibohon an pagbalyo o relokar kan mga pobreng nageerestar sa mga urban o rural na daing hustong konsultasyon asin duman sa mga komunidad na saindang babalyuhan/relokasyon.
Seksyon 11. Kaipuhan an Estado magadaptar nin pinagsaro asin kumprehensibong paagi sa pagpauswag kan salud na hingwahon an
