Sek. 12. An Kongreso kaipuhan magmukna nin Junta sa Konsultasyon na maatol sa Presidente sa mga pamamalakad na apektado an mga komunidad kultural na minorya, na an kadaklan kan mga myembro maghahale sa nasabing mga komunidad.
Seksyon 1. An ano man na enmiyenda o pagliliwat sa Konstitusyon na ini pwedeng iproponer kan minasunod: (1) An Kongreso, sa paagi nin tres-kwarto (3/4) na boto kan mga Myembro; o (2) Sarong Kombensyon Konstatitusyonal Sek. 2. An mga enmiyenda sa Konstitusyon pwedeng iproponer direktamente kan banwaan sa pag-inisyar nin sarong petisyon nin dose (12%) porsyento kan total na bilang kan mga rehistradong botantes, na an kada distrito lehislatibo irerepresentar nin tres (3%) porsyento kan mga rehistradong botantes. Daing enmiyenda sa irarom kan seksyon na ini an pwedeng iawtorisar sa laog nin singko anyos pagkatapos kan ratipikasyon kan Konstitusyon o sarong bes kada singko anyos pakalihis kaini.
An Kongreso kaipuhan magkaag para sa implementasyon kan paggibo kan diretsong ini.
Sek. 3. An Kongreso pwede, sa paagi nin dos-tersyong boto (2/3) kan gabos na Myembro, mag-apud nin sarong kombensyon konstitusyonal, o sa paagi nin mayoryang boto kan gabos na Myembro, magsumiter sa mga botantes nin kahaputan sa pag-apod sa nasabing kombensyon.
Sek. 4. Ano man na enmiyenda sa, o rebisyon kan, Konstitusyon sa irarom kan Seksyon 1 digdi magigin balido kun maratipikaran nin mayoryang boto sa sarong plebisito na gigibuhon antes umabot an sesenta dias makalihis an nobenta dias pagkatapos maaprobaran an enmiyenda o rebisyon.
