Nag-orog an tanog nin buquid asin natacpan nin dampog an banuang Libog; nagrolopad an dadaracol nagapó na nagcacalayo; nagsasabod an linti asin quiquillat; naghohoroghodog, caya sa tacot nin taga Legaspi ipinagprocesión an ladauan nin Divino Rostro.
Ipagpadigdi co cadtong banguing Jueves,
garong farola na halangcao na buquid,
biong nagliuanag an magna lugares,
Arimbay, Biga-a, Boyóan y Rauis.
Can aldao na Viernes nin si ca-agahan
pagtanog nin buquid dai nang pagdangan;
biong naturauis sa poró nin Volcan
baybay asin abó, sa Libog an pucan.
Na baga man igua nin minadalihig
sa toğnod nin Albay, Cagsaua, Camalig;
di arog nangayod can sa Libog dapit,
iba pang visita sa poon nin buquid.
Na siring man sana madiclom na dampog
biong natatacpan banuaan sa Libog;
pagtanao nin tauo capara nangayod
antigong cadlagan na daculang bolod.
An sa honáhonâ nin si isay pa man,
an tauo sa Libog obos nang magadan;
malolot na boot pagpiot nin daghan,
natoró an luhá sa calipůğnauan.
Orog pa si carnal, na magna cadugó
ó magna catood na leal sa puso:
matagas na daghan na siring gapó,
parang binabaac sa labing pagmondó.
Na dağnan pa gayod con maquita baga
magna camogtacan can parientes ninda;
na con dauang dai na-aaraman pa,
con buhay ó gadan, pagmondó labi na.
Mismong pagrolopad daracol na gapó
na siring sa cohetes nacalayong bió,
